Romelu Lukaku kha a danglam tawh asin
Tharum a ngah a, goal khung turin remchang pawh a insiam thei viau - mahse goal khung a harsat deuh thin. Goal khung ngei tura ngaih a hlah khut ṭhin avangin Manchester United ṭantute ngei pawhin an chhuahtir hreh lo a nih kha.
Chhungkaw khawsak harsa ve tak aṭanga seilian Romelu Lukaku hian a nu hnehah an khawsak a la danglam tur thu a sawi a, a thutiam hmasa hi a hlen chhauk tawh - tunah chuan hausa tak an ni tawh. Belgium international hian player danglam a nih tawh thu a sawi leh ta, fiahin a awm dawn.
May thla khan Lukaku hian, "Italy-ah hian tun hma lama ka thlen theih ngai loh kha ka thleng, tuna ka rilru puthmang leh taksa chak ṭha tak ang hi ka la nei ngai lo," tiin a sawi, tunah chuan a hun hmasa lama amah hnawl tawhtu Chelsea meuhin sum tam tak sengin an lei let leh ta.
Hun hmasa lam
Belgium khawpui pakhat Antwerp-a piang Lukaku hi a naupan lai aṭangin a rualpui zingah a lian bik, 6 ft 3 in zeta sang niin tharum a ngah a, a kalna lam apiangah duhkhawp lohna awm ṭhin mah se goal khung erawh a bansan ngai lo.
A chawr chhuahna Anderlecht aṭangin Chelsea a zawm a, a lakah beiseina pawh a sang hle. Mahse, Blues hian an chhawr thiam lo nge a la chhawr tlak loh tih chu inhnial theih a ni ang - loan hmangin West Brom leh Everton lamah an chhuahtir.
Everton-ah hian khawvel hriat a hlawh tia sawi theih a ni. Premier League striker hlauhawm berte zinga miah a inchher chhuak a, champion tum Manchester United chuan sum tam tak sengin an lei, mahse an mamawh ang chhanna erawh a pe thei lo.
Hello Inter
Serie A chu Juventus rorelna hmun tia sawi a ni a, a awm lo hran lo. Turin club hian a zawnin season kua ngawt league nomawi an chawi thei a, midang tan thawk han lak ve eih theihna tur an awm lo a ni ber - 'Scudetto' chu an ta neih a ni ber.
Chinese sumdawng hausa kuta awm Inter Milan chuan Old Lady rorelna tihtawp an tum a, an hmalakna hmasa chu manager ṭha zawn a ni. Italian football hrechiangtu, manager fing leh luhlul Antonio Conte an lalut a, bazar nan pawisa an pe bawk.
Italian manager hian Chelsea a enkawl liin Lukaku hi a hre tawh, khatih lai chuan Premier League-ah an inhmachhawn ṭhin a, a player enkawl chak zawng tak a ni. Inter manager a nih hnu hian sum tam tak sengin Belgium internatonal striker hi a lalut.
Selna karah
Inter Milan manager Conte chuan, "Lukaku kan lakluh tirh khan mi tam takin min sawisel, player ṭha tak a nih loh thu leh a man leh a theihna chu a inphu lo tiin min sawi khum nasa hle. Mahse kei chuan ngaidan dang ka nei thung.
"Lukaku hian theihna sang tak a nei tih ka hmu a, thawhrimna leh tumruhna nen a bei a nih chuan player ṭha zual zawkah a chhuak thei ngei ang tih kha ka ringhlel ve ngai lo," tiin a striker hman thiam chungchang a sawi.
Conte enkawlna hnuaiah Lukaku hi vul a, vul tur erawhin a phenah hrehawm tam tak a paltlang a ngai. Ruah sur nasa tak hnuaiah pawh Conte hian a training luih pui a, a thil ei ṭhin thlengin a tih danglamsak, a taksa ti chak thei tur lam chauh ei a phalsak.
A danglam ta
Training bakah ei leh in thlenga tih danglamsak a ni chuan Lukaku chu 'Lukaku ṭha zawk' atan a chher chhuak. Serie A season a hman hmasak berah hian league match 36 a khelh aṭangin goal 23 a khung hem mai.
Serie A nomawi erawh a la hlawh chhuah pui nghal mai lo, champion Juventus chu point khatin an phak lo. Goal khung hnem lamah pawh Cristiano Ronaldo (25 goals) a tluk lo deuh a, inhnaih erawh an inhnaih vet vet hle.
Kum 2020-21 season a her chhuah meuh chuan Lukaku hi dan theih a ni tawh lo. League match 36 bawk khelin goal 24 a khung a, nomawi an chawi zui bawk - kum 11 hnua a vawi khat nan Inter chu Serie A champion a nih pui a ni.
A puitling
Goal a khung a ni satliah lo, a ṭhiante tan a ṭangkai a, goal bul hnai taka ṭhiante siam sa lo khung ngawt ang kha a ni lo. Goal an neih theih nan a thawh hlawk ṭhin a, goal venhim thlengin a ṭhiante a pui ṭha thei hle.
Conte khan 3-5-2 formation hmangin a naute a rem tlangpui, tlarhmaah Lukaku leh Lautaro Martinez a inkawp tir ṭhin. A thiam dan takin counter attack hmangin an khingpui an nawr ṭhin, chumi atan chuan Lukaku tharum leh tlan chakna an hmang ṭhin.
Kumin February thla khan Lukaku hian Lazio lakah goal hnih a khung bakah assist vawi khat a nei a, 3-1 in an chak. Lazio an hneh avang hian an elpui AC Milan khumin a vawi khat nan Serie A hmahruaitu an ni a, tawn ngai loh boruak an tawng ta.
A la tawp lo
League hmahruaitu an nih hnu hian an elpui Milan nen 'Milan Derby' an khel zui. Inkhel boruak sang tak maiah Lukaku hian Martinez-a'n goal hmahruai a khung theih nan a siamsak, assist nei tur hian anmahni goal bul aṭanga Milan goal bul thleng chak zetin ball a tlan pui a, chumi hnuah a siamsak!
Goal khung chauh a ni ta lo, tunah chuan ṭhiante tan a ṭangkai zual tawh a, season hmasa khan goal 24 a neih bakah a ṭhiante khung tur vawi 10 ngawt a siamsak bawk - goal 34 ngawt a thawk chhuak tihna a ni.
A hnathawh hi sawi nep theih a ni lo a, Serie A Most valuable Player atana an thlang hi thil mak a ni lo. A hna thawh, chet dan leh sulhnu zawng zawng thlirin team hlawhtlinna bakah mimal chawimawina dawn hi a phu hliah hliah.
Nasa takin hma ka sawn tawh. Robert Lewandowski, Karim Benzema leh Harry Kane te hi world-class striker tia sawi ṭhin an ni a, kei pawh world class ka ni a, chu chu ka thil tum pawh a ni,"
- Romelu Lukaku (Euro 2020 laia a sawi)
Martinez leh Conte thu leh hla
Roberto Martinez-a'n Everton a enkawl laiin Romelu Lukaku hi a lalut a, a hmang thiam hle. Spanish manager hian Belgium team a enkawl leh a, a striker hman thiam hi ram inelna lamah pawh kum nga ngawt a chhawr ta, an in hrechiang tawk hle ang tih a chiang.
June thla khan Martinez-a'n Lukaku chungchang hetiang hian a lo sawi tawh, "Ani hi chu goal khung tura piang a ni, theihna sang tak a nei. Tun hma aṭangin goal khung chu a thiamsa, tunah hian a lo puitling lehzual ta tih a lang," tiin a sawi.
Season khat chhunga assist vawi 11 a neih hi a mimal record a ni, tun hmain United tan season khat chhungin assist vawi sarih a lo nei tawh, a record neih hmasa hi assist vawi liin a khum - goal khung bakah ṭhiante tan a ṭangkai zual ta hle.
Inter Milan la Lukaku chher hriamtu Conte pawhin a fak hle. Italian manager chuan, "Taksa chak tak a nei tih chu kan hriat sa a ni, tun hnai kum hnih chhunga a hmasawnna pawh hi sawi hmaih theih a ni lo ang.
"Khelmual chhungah a tlam tam a, ball chan chakin a zawng reng a ni ber. A ṭhiante tan a ṭangkai thei hle, a bik takin goal hmaah a hriamin thutlukna a siam thiam hle. Tun dinhmunah chuan Romelu hi khawvela striker ṭha berte zinga mi a ni," tiin a sawi.
Mimal Chawimawina
IFFHS World's Top Goal Scorer: 2020
Belgian Sportsman Promising Talent of the Year: 2009
Belgian Bronze Shoe: 2009
Belgian Pro League top scorer: 2009–10
Belgian Silver Shoe: 2010
Ebony Shoe: 2011
UEFA Europa League top scorer: 2014–15
Everton Young Player of the Season: 2015–16
Everton Goal of the Season: 2015–16
Premier League Player of the Month: March 2017
PFA Team of the Year: 2016–17 Premier League
Everton Player of the Season: 2016–17
Everton Players' Player of the Season: 2016–17
PFA Fans' Player of the Month: August/September 2017
FIFA World Cup Bronze Boot: 2018
Serie A MVP of the Month: February 2021
Italian Football Hall of Fame (Davide Astori Fair Play Award): 2019
Premio internazionale Giacinto Facchetti: 2020
UEFA European Championship Team of the Tournament: 2020
UEFA Europa League Squad of the Season: 2019–20
UEFA Europa League Player of the Season: 2019–20
Best Belgian Abroad: 2020
Serie A Most Valuable Player: 2020–21