Coronavirus Behbawm

Coronavirus hi nikum December khan China aṭangin a inṭan a, tunah chuan ram 140-ah kang kai tawhin mi 57,000 chuang nunna a la tawh.

1. Pandemic-ah an puang

Coronavirus vei an pung zel a, World Health Organization (WHO) chuan March 11, 2020 khan coronavirus hi 'pandemic' ah a puang. Pandemic an tih chin chu ram khat tawp emaw khawvel pum tibuai pha natna a ni.

Pandemic natna langsar te chu HIV/Aids pandemic (2005-2012), Flu Pandemic (1968), Asian Flu (1956-1958), Flu Pandemic (1918), Sixth Cholera Pandemic (1910-1911), Flu Pandemic (1889-1890), Third Cholera Pandemic (1852–1860), The Black Death (1346-1353), Plague of Justinian (541-542) leh Antonine Plague (165 AD) te an ni.

Coronavirus hi Wuhan, Hubei province aṭanga in ṭan a ni a, China-ah chuan mi 82,000 bawr velin an vei a. WHO-in a record danah chuan China pawnah pawh mi 71,000 velin an vei tawh. Damlo ṭhahnem tak hi endik loh leh chhiar tel loh an awm rin avangin khawvel puma coronavirus vei hi WHO record aia a tam daih rin a ni.

2. Italy-ah an tam

China dawtah Italy chu a hluarna hmun niin mi 21,000 chuangin an vei tawha ngaih a ni a, Iran leh South Korea-ah coronavirus vei 13,000 leh 8,000 bawr vel awmah an ngai.

Italy-ah hian coronavirus vanga thi hi 1,400 bawr vel an ni tawh. Italy-a case hmasa ber hi January 31-ah hmuhchhuah a ni chauh a, February 20 thlengin pahnih chauhin pung chho mah se tun hnai ni hnih chhung lekah pawh mi 6,000 in an pun belh.

Italy-ah hian school, gym, museum, nightclub leh mipui punkhawm theihna ang te chu khar vek a ni a, mipuite chu in lama inkhung tura ngen an ni a, ṭul bik thilah lo chuan zinchhuak lo tura tih an ni bawk. Airlines ṭhahnem takin April 1 hmain Italy thlawh an duh tawh lo a; British Airways, EasyJet leh Ryanair te pawh an tel. 

Italy bakah hian Europe ram dang Spain, France leh Germany-ah pawh coronavirus vei hi mi sang khat chuang an awm tawh. 

3. China-ah an la tam ber

Tun hnaiah China-a coronavirus vei pun chak dan tlahniam deuh mah se he natna vei tamna ber an la ni tho. Khawvel puma 152,000 vei zinga mi 81,000 chu China aṭanga vei an ni.