UKAD-in Tyson Fury an chhui dawn

UK Anti-Doping chuan lo neitu pakhatin Tyson Fury-a intih chakna hman chungchangah a pui nia a insawi chu thu takah ngaiin an chhui dawn a, Fury promoter Frank Warren chuan, "Thu lawilo mai a ni," tiin he inpuhna hi a pha thung. 

February 2015 khan Fury hi a unaupa (cousin) Hughie nen intihchakna an hmangah ngaih a ni a, mahse hei hi sanghal sa an eiah a lo tel vang niin an sawi. Mahse, tun hnai khan lo neitu Martin Carefoot chuan Fury-te phatna thlawp tur leh sanghal sa chu ama lei tir anga sawi turin a hunlai hian £25,000 thamna sum pek tiam a nih thu a sawi chhuak. 

Lancashire-a loneitu Carefoot hi UKAD-in Fury an chhui tirh khan thuhreutah a ṭang a, sanghal sa hi ama lei tir a nih thu a sawi. Mahse, tun hnaia chanchinbuin an kawmnaah a in puang leh si a ni. Carefoot hian sum an tiam zat hi pek a nih loh thu a sawi a, Fury nena thawkdun boxing promoter Warren chuan UKAD-in loneitu thu leh hla thutaka an ngai chu mak a tih thu a sawi. 

Warren chuan, "Carefoot hian nikum Ocotber khan lehkha min thawn a, phone-a ka biakin sum a lo phut a ni. UKAD hnena kal turin ka hrilh a, chanchinbu hmaa sawi a thlang ta zawk. Hetiang mihringin ngaih pawimawh a hlawh thei hi a mak hle a ni," a ti. Fury leh Hughie hi February 2015 khan intih chakna damdawi an hmang tih hi hmuh a ni a, June 2016-ah thubuai siamsak niin December 2017 aṭangin inhnek leh phalsak an ni.