Chelsea-in Werner an hmin?

Chelsea leh RB Leipzig chu Timo Werner chungchangah an indawr a, London club hian Germany international striker hi an lalut ngei dawn niin a lang. Frank Lampard-a hote hian thla liam ta khan Olivier Giroud-a contract chu kum khat atan an pawtsei a, nipuia lakluh turin Ajax aṭangin Hakim Ziyech an ti fel tawh a, tunah Werner an ti fel hnai ta bawk.

Kum 24 mi Werner hian tun season Bundesliga-ah goal 25 a khung tawh a, amah aia khung tam chu Bayern Munich striker Robert Lewandowski chiah a awm. German striker Werner hian ram tan vawi 29 a khel tawh a, goal 11 a khung tawh.

Bundesliga-ah Werner hi Borussia Dortmund winger Jadon Sancho leh Bayer Leverkusen midfielder Kai Havertz te hi khelmualah an chet ṭhat avangin thawm an nei ring hle. Liverpool recruitment staff thlirna aṭang chuan Werner hi a tlan chakna avang leh position hrang hrang a khelh theih avangin Sancho leh Havertz ai pawhin an dah sang zawk a, chu chu Chelsea kawr ha tura ngaih a ni.

Kar thum liam ta kha chuan Timo Werner-a ngaihtuahna chu Liverpool-ah a awm. Jurgen Klopp-a zunah a uai a, German manager nen vawi tam tak whatsapp chat hmangin an inbia a, vawi hnih an inhmuh bawk avangin Anfield-a kal ngei tura ngaih a ni.

Werner duh thlanna hi Liverpool ni mah se Reds hian Europe-a striker chhuak thar ṭha ber zinga mi lakna tur hian RB Leipzig lawmna tur tawk sum thehchhuah mai an harsat. Chelsea erawhin Roman Abramovich an nei a, Russian pa hausa hian Covid-19 vanga sum an ren ṭhup laiin player ṭha lakluh nan a theh chhuak phal.

Tunkar Ningani khan boruak a dang thut a, Liverpool nena sawi zawm Werner chu Stamford Bridge-a kal turin sawi a ni ta thung. Khawtlang media-te tarlan danin Blues hian Werner hi a 'release clause' pound maktaduai 54 (€60m) in an lalut ngam a, karleh hian an inbe fel ang.

Tuna Chelsea an rawn lan hma hian Timo Werner tan duh thlan tur pahnih a awmah a ngaih theih. Pakhatna chu Liverpool lama kal a ni a, pakhat zawk chu RB Leipzig-a hun rei zawk cham a ni.

Amaherawhchu pound maktaduai 54-a lakchhuah theihna release clause tawp hun chu June 15 a ni a, Werner-a ngaihtuahna a buai ṭan. German striker hian Bundesliga zawh meuh chuan Merseyside lama a awmna tur engkim tih fel a, chawlh hman a duh.

Chutihrualin nikum khan Bayern Munich pan turin RB Leipzig a mangṭha hman a, inremna a tlawlh leh ta si. Kuminah erawh Werner hian thlen nawn tir a tum a lo.

Werner hian Liverpool thutlukna an siam theih nan hun hran a tuk a, Jurgen Klopp-a hoten release clause an ngam chuan German striker hi an chang dawn. Klopp-a'n club thuneitu Fenway Sports Group a bia a, hemi hnu hian Werner hnenah sum vanga an lak theih loh tur thu a hrilh a, a theihna a iai vang a nih loh thu a hrilh tel avangin anni pahnih inkarah intih thiam lohna a awm lo.

FSG hian Liverpool lakah hlawkna ringawt an um a ni lo a, club-in kalphung nghet a neih a ngai pawimawh. Covid-19 vanga inkhelh theih loh chhungin Reds-in an hnathawkte hlawh pek nan 'furlough scheme' hman an tum a, sawiselna a nasa a, an sut leh tak si avangin chief executive Peter Moore chuan sum tam tak an hloh tur thu a sawi lawk.

Liverpool erawhin sum vanga Werner lalut thei lo tih hi an pha thung. Klopp hian chhawr theih turin tlarhmaah vanglai hun hmang mek Sadio Mane, Roberto Firmino leh Mohamed Salah te an kawl a, Werner hi subsitute-a bul ṭan tur ringawta lakluh hi a ṭulna an hre lo.

Klopp thlirnaah chuan January 2021-ah Africa Cup of Nations khelh a nih dawn avangin Mane leh Salah te kar ruk chhung an chan dawn. Hemi a nih avangin Werner lakluh hi an mamawh. Tunah erawh inlena hi Covid-19 vangin kum 2022-ah sawn a ni dawn a, player manto tak lakluh hi a ṭulna a awm rih lo.

Liverpool an inhnuhdawh chiah hian Manchester United leh Chelsea tan hun ṭha a inhawng. February thla khan Ole Gunnar Solskjaer-a'n Berlin-ah Werner hi a hmu a, Klopp-a hmu hnu lawkah a hmu lehnghal tihna a ni. Amaherawhchu United hian Paul Pogba leitu an hmuh loh chuan release clause an ngam loh tur thu an ti chiang nghal.

Chelsea erawh neuh neuh an nei ve lo. Club director Marina Granovskaia-i'n relase clause an ngam tur thu an tichiang nghal a, manager Frank Lampard-a'n Werner hi biain team tana a pawimawh dan tur a hrilh nghal. Lampard nen ṭum hnih hun rei tak an inbiak hnuah German striker hian a coach ngaihsan zinga mi hnuaiah player rawlthar beiseiawm dang nena khelh a duh.

Covid-19 vangin Chelsea official-te Germany-ah Werner chungchang indawr turin an zin thei lo a, Granovskaia-i'n a lawyer Dr Michael Becker nen mipui hriat loin an dawr. Becker hi Michael Ballack nen pawh an lo thawk dun tawh a, transfer chungchangah German club a thawhpui 

ṭhin bawk. Werner pawh DFB dan vangin a zin thei bik lo a, chutihrualin an inremna turah thutlukna harsa siam tur a awm lo.

Leipzig hian Werner hi chelh duh mah se sum chevel a tam avangin chhuah a duhna an pawmsak a, an club-ah kum khat dang cham a duh pawhin an pawm tho. Tun nipuiah Werner hi a chhuak lo a nih chuan kum 2021-ah chuan a release clause hi euro maktaduai 40-ah a tla thla dawn a, 2022-ah phei chuan euro maktaduai 25-ah a tla ang.

Ningani chawhnu khan a thuphungin Werner hian Chelsea zawm a duh thu a ti chiang a, hemi chanchin hi put ru nghalin a darh chak nghal hle. Blues tana Germany international defender awmsa Antonio Rudiger pawhin Stuttgart youth leh senior team-a a khelhpui ṭhinina zawm tur hi lawm hle.

Karleh lam hian Chelsea leh Leipzig hi Werner-a chungchangah inrem tura ngaih an ni a, chinfel ngai erawh a awm. Pakhat chu sum pek dan chungchang a ni a, ruahmanna awm danah chuan tun transfer-ah hmun thuma ṭhena hmun hnih hi an pe ang a, a bak zawng hi nakkum January-ah an pe tla ang.

Pakhat leh chu contract rei zawng a ni a, Chelsea hian kum nga chhung atan inremna ziahpui an duh. A dang leh chu a hlawh chungchang a ni a, kum tina pung tur a nih a rinawm. Tuna a lan dan chuan Werner hian kum khatah pound maktaduai 9 a lak a hmel a, chu chu kar khata  £170,000 vel a ni a, bonus a la tel bawk ang.