Champion zia Chhuahtu Chelsea

UEFA Champions League champion lai leh UEFA Super Cup champion hlim Chelsea chuan Premier League match hmasa berah Crystal Palace 3-0 in an hneh a, Thomas Tuchel-a hoten champion zia an chhuah.

Eagles hi Arsenal legend Patrick Vieira-a'n a enkawl a, Chelsea hmaah dawl zawrin an zawr. Stamford Bridge-a inkhelah hian Blues tan Marcos Alonso-a'n freekick aṭangin a khung a, Christian Pulisic leh defender Trevoh Chalobah ten an khung belh.

Squad a chhah
Chelsea-in tlarhma ti chak turin Romelu Lukaku chu Inter Milan aṭangin pound maktaduai 97.5-in an lalut a, Belgian striker hi Palace hmachhawn turin a la inpeih hman lo.

Thomas Tuchel-a'n Villarreal an hneh ṭuma inhliam Hakim Ziyech a chhawr thei lo a, player ṭha dang midfielder ṭha mi N'Golo Kante, wing back goal bawh na Ben Chilwell leh Reece James, defender tawnhriat nei ṭha Thiago Silva leh Champions League final-a goal khungtu Kai Havertz te bench-ah a dah.

Chelsea tana khel lo langsar mah se a khelah te pawh an langsar a, an squad chhahzia a lang. Blues tana bul ṭantute hi Edouard Mendy; Chalobah, Andreas Christensen, Antonio Rudiger; Cesar Azpilicueta Jorginho, Mateo Kovacic, Alonso; Pulisic, Timo Werner leh Mason Mount te an ni a, an la ṭha hle.

An thiam e
Ṭan phat aṭangin Chelsea passing hmuh a nuam nghal a, vei lam aṭanga Alonso cross chu Pulisic-a'n goal zawnah a tauh. London club goal bawh a na a, goal a luh thuai a rinawm.

Minute 27-naah Alonso chuan freekick aṭangin mawi zetin a pet lut a, Palace keeper Vicente Guaita-a'n a en liam. Mount a la ṭha reng a, England international hian mual ding lam aṭangin ṭha zetin a cross a, hemi aṭanga per chu Pulisic-a'n harsatna nei loin a khung.

Werner erawh goal hmaah season liam ta ang thoin a la vanduai a, chance ṭha nei mah se goal a khung lo. Minute 58-naah Chalobah-a'n box pawn aṭangin ṭha zetin a pet lut a, goal a khung zawh hian ṭhing nghalin a mittui a tla.

Kum 22 mi Chalobah hian kum riat a nihin Chelsea a zawm a, UEFA Super Cup-ah bul a ṭan hnuin Premier League match hmasa ber a khel a, goal a khung nghal. Chalobah chuan, "Goal ka khung khan awm dan tur ka thiam lo, ka ṭhingṭhi nghal a, lawm avangin ka ṭap a ni," tiin inkhelh banah a sawi.

Tuchel a lawm
Chelsea manager Thomas Tuchel chuan, "Romelu Lukaku tel loin goal thum kan khung a, penalty a la tel lo. Chutihrualin tlarhma lamah insiamṭhat kan la mamawh a, goal hmaa hlauhthawn loh a ngai a, tun aia kan hriam a ṭul," tiin a sawi.

Blues hian Arsenal hmachawn turin August 22 hian Emirates Stadium an tlawh ang a, chumi zawh chuan Liverpool, Aston Villa, Tottenham leh Manchester City te an hmachhawn dawn avangin an fixtures a hautak hle.