Varane an tlangzarh

Manchester United chuan Real Madrid aṭanga an lakluh Raphael Varane chu Leeds United an hmachhawn hmain an tlangzarh a, jersey no. 19 a ha dawn. Varane man hi pound maktaduai 34 a ni a, a chet ṭhat dan a zirin pound maktaduai 42-ah a pung chho thei ang.

Kum 28 mi Varane hian Los Blancos tan kum 10 khelin nomawi 18 a chawi zingah La Liga title pathum leh Champions League pali a tel. World Cup-a France champion puitu defender chuan, "Manchester United hi khawvel football club ropui ber zinga mi a ni a; Man United leh Premier League khelhna hun ṭha hi ka tan bawhpelh phal rual a ni lo," tiin a sawi.

Sir Alex Ferguson-a'n a hun laiin Varane hi lak a tum tawh a, Jose Mourinho pawhin Old Trafford-ah lakluh a tum tawh bawk. Ole Gunnar Solskjaer chuan, "Kum 10 chhunga khawvel defender ṭha ber zinga mi kan chang thei hi ka lawm. Champion theih angah chuan a champion vek tawh a, chuti chung chuan hlawhtlinna duhin a tui hal a ni," tiin a sawi.

Man Untied hian tlarhnung Varane bakah Harry Maguire, Victor Lindelof leh Eric Bailly te an kawl. France international defender Varane hi England defender Maguire nena inkawp tura beisei a ni.