Messi lawm nan PSG an chak

Lionel Messi leh player an neih tharte chu Inrinni zan khan Paris St-Germain chuan an tarlang a, inkhel en tura pungkhawm mipui thawm a ṭha hem hem hle. Player thar an lawmna belhchhah turin an mikhual Strasbourg chu 4-2 in an hneh.

Le Parc des Princes-ah inkhel ṭan hmain PSG hian Messi, Sergio Ramos, Gianluigi Donnarumma, Georginio Wijnaldum leh Achraf Hakimi te an pho chhuak, player thar zingah Wijnaldum leh Hakimi ten match an khel zui - midang erawh squad-ah an la awm lo.

Hello Messi
Barcelona captain a ni a, a naupan lai aṭangin club dang a la nei ngai lo. Mahse, Messi-a'n Catalan club chhuahsanin PSG chu season hnih chhung atan a zawm a, khawvelin Paris lam a hawi ṭhup, social media lama PSG lar thar dan leh jersey an hralh hnem dan pawh ngaihnawm a tling.

A inkhelh hma aṭangin Messi thawm a lian nghal em em a, a ball pet lai an hmu chak tawh. Mahse ni hnih chauh training a la zawm avangin coach Mauricio Pochettino-a'n a la chhawr lo, an match lehpekah chuan a inlan tawh a rinawm.

Messi bakah Donnarumma pawh a la khel rih lo, defender Ramos erawh hliam vangin a la chawl rih dawn - forward ṭha mi Neymar pawh a chawlh hmang zo a la inlan lo, Paris club hi an ṭhat dan berin an la khel rih lo tihna a ni.

PSG an chak
Player thar ṭha tak tak tel lo pawhin Ligue 1 lamah PSG tan harsatna a awm rih lo. Mauro Icardi, Kylian Mbappe, Julian Draxler leh Pablo Sarabia te goal khat ṭheuh hmangin Strasbourg chu an sawp.

Strasbourg hian inkhel tir lam darkar chanve chhungin goal thum an phur hman, beisei loh takin Kevin Gameiro leh Ludovic Ajorque te hmanga sut ṭhenin beiseina pawh an nei sang hman hle - mahse an beisei ang erawh a thleng zui lo.

Hun tawp hma minute 10 la awmah Alexander Djiku chuan Icardi a tih tluk avangin yellow card pahnihna hmuin hnawh chhuah a ni a, an team beiseina a thamral zui nghal; match hnih an khelh tawhah chak an le nei lo, PSG erawhin point ruk hmuin hma an hruai.

Champion an tlawm
Season hmasa khan Paris St-Germain khumin Lille an champion a, mahse club neitu an inthlak boruak vel vangin champion puitu manager Christophe Galtier an ban, an ban tak hian Nice enkawlin a team hlui hi 4-0 in an sawp.

Champion lai hian minute khat pawh a liam hmain goal an chhuah nghal, second 55-na lekah Nice tan Kasper Dolberg-a'n goal a khung ṭan a, a hnuah Hicham Boudaoui leh Amine Gouiri ten an khung bakah, goal khatna khungtu Dolberg bawkin an goal lina a khung.

Kum 54 mi Galtier hian Lille kha Ligue 1 title a lakpui aṭanga ni hnih hnu lekah a mangṭha a, a hna hi ama thua chawlhsan niin sawi ni mah se, a nihna takah chuan 'chhuah tir' a ni; a club hlui laka hnehna chan nghal hi thil lawmawm bik a ni ngei ang.