Goal thum nena bul ṭantu Liverpool

Liverpool boss Jurgen Klopp-a'n Norwich City an hmachhawn hmain man to taka player thar lak belh an mamawh loh thu a sawi a, an match hmasa ber aṭanga tehna siam nghal tur a nih chuan German coach hian a sawi dik.

Inrinni zan khan Liverpool chuan an mikhualna ramah Norwich City chu 3-0 in an hneh a, Mohamed Salah, Diogo Jota leh Roberto Firmino ten goal khat ṭheuh an khung.

Reds tan Salah bawk a langsar a, goal khat a khung bakah goal hnih dang hi a assist ve ve a ni - Premier League-ah season nga chhung a zawna league khelh ṭan kara goal khung ziah thei awmchhun record a siam.

Liverpool lawm nan thla 10 zet hliam vanga a inlan theih loh hnuah Virgil van Dijk a lo kir a, kum 30 mi defender a lo kir leh tak avangin Reds fan-ten champion an beiseina a sang lehzual ang.

Norwich an ṭha
Championship nomawi chawitu Norwich-in mahni khelmuala inkhel an ni tih an hria a, Liverpool lakah dawi taka khelh an tum lo - inkhel ṭantir minute 25 lam chu an hmuhnawm a, an mikhual aiin ball pawh an chang tam zawk.

Norwich inlan hma hian anmahni ang thoa kai thar Brentford chuan 2-0 in Arsenal an barakhaih a, Watford-in sum hmang hnem Aston Villa chu 3-2 in an hneh bawk. He result ringawt pawh hi Norwich fuih phur nan a tawk.

Carrow Road-ah Liverpool-in Trent Alexander-Arnold, VVD, Joel Matip leh Konstantinos Tsimikas an din tlar tir a, bench-ah Joe Gomez leh Ibrahima Konate an awm bawk avangin season hmasaa an talbuaina tlarhnungah Reds an inringthar hle.

Mahse, Norwich-in hlau loa an nawr ngam avangin Liverpool tlarhnung a nghing leh ṭhin a, Teemu Pukki-a'n Reds tlarhnung tlanpela Alisson a enchhinnate kha Norwich lam chuan an en letin an ui vawng vawng ang.

A tawpah
Minute a rei telh telh a, team ṭha zawk danglamna a lang - minute 26-naah Arnold-a ball cross chu Salah-a'n tawk fuhin Jota ke bulah tak a tla a, Firmino aia bul ṭantir forward hian harsatna nei loin goal-ah a chantir.

Goal dang a lut lawk lo a, Klopp-a'n hahdam taka awm turin goal dang khung an mamawh tih a hria. Minute 61-naah Jota a la chhuak a, Firmino a luhtir. Brazilian forward hian khelmualah minute li chiah hun a hmang hman tihin a khung nghal a, Salah siamsak bawk a ni.

Minute 74-na a ni a, Salah hun a her chhuak - Egyptian forward hian ama thawhrah sengin an goal thumna a khung a, Norwich tan Liverpool laka 'comeback' beiseina a bo zui nghal.

Liverpool tan tlarhmaa an player chhuanvawr pali zinga pathumin goal an khung a, tlarhnung lam an phui ta viau bawk - Norwich laka an result hi Reds fak chiam nan chuan 'nau' deuh mah se fan-ten beiseina thar an neih phah a nih pawhin a awm lo hran lo.

Kan ngaih pawimawh ber chu result a ni fo a, mahse, chu result ṭha nei tur chuan khelh ṭhat a pawimawh - kan result kha kan phu tak meuhin ka hria. - Jurgen Klopp, Liverpool manager

Player an lo kir leh ta vek a, hetianga Premier League a lo kir leh thei ta hi hmuh nuam ka ti. Kan vaia kan 'fit' tlang reng thei a nih chuan champion turin chance kan nei ṭha tawkah ka ngai. - Virgil van Dijk, Liverpool centre back