Arsenal an tlawm nghal pang

16th August, 2021

Premier League 2021-22 season inkhel hmasa berah Arsenal chu goal khung loin an tlawm nghal pang. Gunners hi kai thar Brentford mualah leng lutin 2-0 in an chak lo, manager Mikel Arteta nauten season hmasa lama an ze ṭha lo an la kalsan lo.

Brentford Community Stadium-ah mipui an pungkhawm leh thei tawh a, inkhel ṭan hma aṭangin thawm a ṭha mep mep hle. Kum 74 hnua English football inelna sang ber khel ve leh chauh Brentford tan Sergi Canos (22') leh Christian Norgaard (73') ten goal an khung.

Duhthusam
Hun rei tak chhung Premier League khelh châkin an thlir a, khel teuh viau ṭhin mah se an beiseina a thamral leh ṭhin. Brentford hian Thomas Frank kaihhruaina hnuaiah attacking game hmuhnawm khel chungin EPL an inpet kai a, inelna tak an hmachhawn hmasak berah an chak nghal.

Brentford lamin goal hnih an khung a ni satliah lo, inkhel tir lamah Bryan Mbeumo chuan goal bar a pet per dawp a, an khelmuala khel an ni bawka inrintawkna an nei sang tih a lang chiang bawk - team hmuhnawm an ni.

Frank chuan, "Ka naute hian hnehna chang turin theihna an nei tih ka hria, chumi thlawp tur chuan fans lamin an tih theih ang zawng zawng an ti bawk. Hnehna chan phu zawk kan ni, ka lawmna em em chu hlauthawng miah loa kan khel thei kha a ni," tiin a sawi.

Auba awm lo
Pierre-Emerick Aubameyang leh Alexandre Lacazette ten inbuatsaihna an nei ṭha a, friendly match an khelh hmasak hoah pawh an inlan thei. Mahse, league an khelh ṭan niah an inlan thei lo a, an inlan loh chhan hi an damlo tih bak sawi a awm lo.

Player tawnhriat nei ṭha pahnih an damloh rual ngawt chhan hi tarlan a ni lo. Season hmasa khan Auba hi captain nihna pek a ni a, khelmual chhung leh pawna a chet danah amah duhkhawp lohna a nasa, a ṭhianpa Lacazette pawh hi chhuak tur angin thawm a awm reng.

Gunners tan defender Ben White chuan inkhel bul a ṭan nghal a, goal hnih an chhuah miau avangin fak a harsa. Rawlthar Emile Smith Rowe leh Bukayo Saka te hi rinrawl an nih hmel a, player thar an la a nih ngawt loh chuan season thara Champions League khelh a harsa ang.