WBO batamweight title humtu Casimero

Filipino boxer John Riel Casimero chuan Cuban boxer Guillermo Rigondeaux chu split decision a hnehin World Boxing Organization (WBO) bantamweight title a kawl lai chu a humhim leh ta.

Dignity Health Sports Park, Carson, California-a inhnekah hian judge pakhat chuan Guillermo chu 115-113 a chak zawkah a ngai a, mahse, judge dang pahnihin 116-112 leh 117-111 a Casimero an chak tir avangin split decision hmangin chak zawkah puan a ni ta a ni.

Kum 31 mi boxer chuan, "Knockout ka duh a, mahse, Rigondeaux kha a tlanchhe reng ringawt mai a ni. Rigondeaux hi engtiklai pawhin a tlanchhe reng a, fight tak tak a ngam ngai lo," a ti zui.

Casimero hian November 2019 khan Zolani Tete hnehin WBO bantamweight title hi a hlawh chhuak a, Rigondeaux a hmachhawn hma hian Duke Micah lakah a kawnghren hi a lo humhim tawh bawk.

Filipino boxer Casimero hian vawi 35 fight a hmachhawnah vawi 31 hnehna a channa a ni a, vawi li a tlawm tawh bawk - September 2017-a amah ang thoa Filipino Jonas Sultan a ngam loh hnuah vawi sarih chu a zawnin a chak tawh.

Casimero hneh tak Rigon-deaux tan erawh vawi 23 fight-a hmachhawna vawi hnih a tlawmna chiah a ni a, vawi 20 chak tawhin vawi khat erawh referee thutlukna dik tawk loh avangin 'no contest' a puan a ni thung.