Muhammad Ali tupa a chak nghal

Mi tam takin boxing khawvela mi ropui ber ang hiala an ngaih Muhammad Ali-a tupa Nico Ali Walsh chuan professional fight a hmachhawn hmasak berah hnehna a chang nghal a, round khatna lekah a khingpui Jordan Weeks chu a hneh!

Catoosa, Oklahoma-a middle-weight fight-ah hian Ali-a tupain inhnek ṭan rualin a thunun nghal a, second 70-na lekah a khingpui Weeks hi a hnek tlu. Weeks-a'n ngai a awh leh tawh lo a, minute khat leh second 49-naah inhnek tihtawp a ni.

Ali Walsh chuan, "Zinkawng lunglenthlâk tak a ni a, result pawh ka beisei ang ngei a ni. Ka ngaihtuahnaah ka pu a awm nasa hle a, ka ngai takzet a ni," tiin a sawi.

Kum 21 mi Ali Walsh hi college kal lai a ni a, a nu Rasheda Ali chu Muhammad Ali fanu a ni - Ali Walsh hi boxing promoter lar Bob Arum-a company Top Rank hnuaiah a awm a, Bob Arum hian Muhammad Ali-a fight 61 zinga 27 chu a huaihawt a ni.

Arum chuan, "Thisenah a inthlah chhawn theih tih ringtu ka ni," tiin Ali Walsh 'promote' a duh chhan a sawi a, a pu anga boxer ropui a nih theih a beisei.

Ali Walsh hian hnehna a chan hian kekawrbul var, a kawng dum chu a ha a, hei hi a pu tana siam, a puin a damlaia a pek a ni.

The Greatest hminglem hial an pek Muhammad Ali khan world heavyweight title chu vawi thum ngawt a hlawh chhuak a, vawi 61 fight hmachhawnin vawi 56 a chak a, vawi nga a tlawm - June 3, 2016 khan kum 74 mi niin a thi.

Ali Walsh hian a pu hlawhtlinna zahve ang chauh pawh a chang phak a nih chuan boxing career ropui tak a hmang a ni ang.