Tsitsipas zinkawng a tawp

National Bank Open khelh laiah champion tura rinkai Stefanos Tsitsipas chu semifinal paltlang zo loin a tla. Greek tlangval hi a khingpui Reilly Opelka lakah 6-7(2), 7-6(4), 6-4 in a chak lo.

Inrinni zan inkhelah seeded pathumna Tsitsipas hi a tir aṭangin a che fuh tawk lo a, set thum an khelh chhungin world number 32 Opelka chu chak phu zawk a ni a, a vawi khat nan ATP Masters 1000 final a lut.

Semifinal lehlamah Daniil Medvedev chuan service nei ṭha John Isner chu 6-2, 6-2 in an lo hneh ve bawk, seeded pakhatna Medvedev leh Opelka ten nizan zanlai khan final an khel zui a, result kan hre hman lo.

World number 3 Tsitsipas-a'n season ṭha pangngai tak a hmang, May thla khan Monte-Carlo title a la, a hnu lamah erawh nomawi chawi a harsat. Tunah chuan August thla tawpa khelh tur US Open atan rilru a sawrbing ang.