King Carlo 'Lal Ram' din thar a ni dawn e!

Real Madrid chu coach thar Carlo Ancelotti enkawlna hnuaiah an chak nghal a, Inrinni zan khan tun season-a an league match hmasa berah Alavés chu 4-1 in an sawp.

Madrid khaw club tan Karim Benzema bawk chu player pawimawh a ni a, French striker hian goal hnih a khung - Nacho leh Vinícius Júnior ten goal khat ve ve an khung bawk.

Everton aṭanga Real lama hlawh tlem zawka kir thlangtu Ancelotti-a'n a league match hmasa berah hnehna a chang a, Real fan-ten result ṭha zawk an beisei chhunzawm zel ang.

La Liga-a Real elpui ber tura ngaih, champion lai Atletico Madrid leh Lionel Messi chântu Barcelona te chu nizan khan an inlan a, he thu buatsaih a nih lai hian result kan hre hman lo.

King Carlo
AC Milan coach ropui Ancelotti-a'n 2013-15 season inkar khan Real Madrid a lo enkawl tawh a, Champions League, UEFA Super Cup, FIFA Club World Cup leh Copa del Rey-ah a champion pui.

Mahse, Italian coach hian hnathawh zawh loh a nei - La Liga-ah a champion tlat lo! Ancelotti hian Everton-ah pound maktaduai 11.5 bawr vel a hlawh nia sawi a ni a, Real-ah hian 40% velin a hlawh a tihniam - an ti!

Italian coach hi a tumah a chiang - chu chu Real a enkawl hmasaka a tih theih loh tih a ni a, La Liga champion a duh. Champions League nomawi pathum chawi tawh coach hian a duhna chu thil tihin a lantir nghal.

'King Carlo' hming lem an pek coach hian Real a kir lehna match hmasa berah hnehna chang turin harsatna a nei lo a, first half-ah goal khung lo mah se minute 56 an thlen meuh chuan goal thum an khung tawh.

A hming Benzema
Real tan striker rinrawl Benzema chu minute 48-naah a inlar a, goal hmasa ber a khung - minute 56-naah Nacho-a'n a khung ve leh a, Real hlim authawm pawh a reh fel hmain minute 62-naah Benzema-a'n a chhunzawm leh zat.

Minute 65-naah Alaves-in beiseina thar an nei a, Joselu chuan penalty hmangin si phurh a sut ṭhen. Mahse, Alaves tan Real laka comeback turin goal hnih dang tal khung leh a la ngai a, team pahnih quality enin Alaves tan a harsa hret tawh tih a lang.

Hun pek belh minute hnihnaah Real zawkin Vinicius hmangin an khung ve leh a, chak tur a chiang tawh. Real-in an beisei point thum an hmu a, an lawmna tizual turin Benzema-a'n goal khung a la ṭhulh lo.

Kum 33 mi striker hian season hmasa khan Real tan inelna hrang hrangah match 46 khelin goal 30 a khung a, La Liga bikah match 34 khelin goal 23 a khung - tun season-ah champion an tum chuan Benzema chet ṭhat a ṭul ang.

Real an kim
Real fan-te tan lawmna tur a awm - Tottenham Hotspur-ah season khat chhung loan-a a khelh hnuin Gareth Bale a lo kir leh ta a, Ancelotti chuan Real a enkawl hmasaka a player pawimawh hi bul a ṭantir.

Eden Hazard pawhin bul a ṭan a, a khel ṭha hle. Belgian playmaker hian Benzema goal hmahruai khung a siamsak a, he goal luh nana a 'backheel' chu a thiam a la theihnghilh lo tih pholanna a ni.

Bayern Munich aṭanga free transfer-a Real Madrid pantu

David Alaba chuan left back-ah Madrid khaw club tan bul a ṭan a, Austrian defender khelh dan enin Madrid fan-ten a thlawna an chang thei hi vannei an inti khawp ang.

Alaba hian hun pek belha Vinicius-a goal khung tur chu a siamsak - match hmasa ber aṭanga teh tur a nih chuan Real tan champion beiseina a awm a, phul hlut nan erawh a la hma hret mai thei.

Inkhel Results
Valencia 1 - 0 Getafe
VAL: Carlos Soler 11' (P)

Real Mallorca 1 - 1 Real Betis
REM: Brian Oliván 25'
REB: Manolo Reina 59' (OG)

Cadiz 1 - 1 Levante
CAD: Alfonso Espino 90'
LEV: José Luis Morales 39'

Alaves 1 - 4 Real Madrid
ALA: Joselu 65' (P)
REM:Karim Benzema 48, 62'; Nacho 56'; Vinícius Júnior 90'

Osasuna 0 - 0 Espanyol

Zanin Inkhel Tur
Villarreal 11:30 PM Granada
Elche 01:30 AM Athletic Bilbao