Benitez-a'n Everton a chakpui nghal

Rafael Benitez enkawlna hnuaiah Everton-in hnehna an chang nghal a, Southampton lakah goal chhuah hmasa zet mah se 3-1 in an lehthal.

Saints tan Adam Armstrong chuan minute 22-naah goal hmahruai khungin Goodison Park a barakhaih a, Everton-a lawm hlawh lo Benitez-a'n hmelma a neih belh dawnin a lang hman.

Mahse, Valencia, Liverpool, Chelsea, Inter Milan leh Real Madrid meuh pawh lo enkawl tawhtu coach hi boruak sangah a talbuai lo a, second half-ah Everton an 'comeback' chiang hle.

Benitez-a'n tlarhmaah Richarlison a sawn chho a, a tifuh nghal.Brazil tana Olympic gold medal hlawh chhuak zo hlim forward hian minute 47-naah si phurh sutna goal a khung a, minute 70 hnu lamah Abdoulaye Doucoure leh Dominic Calvert-Lewin ten goal khat ve ve an khung bawk.

Liverpool a enkawl laia 'club tenau' tia Everton lo sawi tawhtu Benitez-a'n a team a chakpui a, team ṭha Saints laka chak an nih avangin inkhelh zawhah Benitez sawiselna thawm a ri tawh lo.

Spanish manager chuan, "Fans tam zawk hian ka theihna zawng zawng pe ṭhin ka ni tih an hria ang. Inel nuam timi ka ni a, he hmunah pawh hian theihtawp ka chhuah zel dawn.

"Mahni hna chu ṭha taka thawk a, hnehna chan reng duh mi ka ni a, vawiina fan-te thlawpna ang kha hmuh zel ka beisei a, ka hlim takzet a ni," tiin a sawi.