Inter tan Dzeko inlan nghal

Inter Milan chuan striker man tam Romelu Lukaku an hralh hnu lawkah AR Roma aṭangin Edin Dzeko an lalut nghal a, ani bakah hian Euro 2020 lai hriat hlawh Denzel Dumfries pawh an lei fel nghal bawk.

Kum 35 mi Dzeko hian Inter tan season hnih daih contract a ziak a, a man zat chiang taka tarlan a ni lo. Inrinni zan khan Dynamo Kiev nen friendly match an khelhah a inlan nghal a, a club thar tan goal khat a khung nghal.

Bosnia-Herzegovina captain hian Italian football a hrechiang tawh hle. Roma tan league match 260 a khelh aṭangin goal 119 a khungsak tawh a, insiamrem hranpa vak ngai loin Inter tan chhawr nghal theih tur a ni ang.

Dzeko chuan, "Inter hian ka lakah beiseina an nei sang a, min rin ngam bawk avanga zawm ka ni. Season ruk chhung chu Serie A ka khel tawh, hetih chhung hian Inter chet hmang hi ka lo zirchiang viau tawh, an hnena ka khel thei hi ka lawm.

"Inelna tak hma-chhawn ka chak tawh, chumi tur chun hun rei lote chhung training-na hun kan neihah a ṭha thei ang bera tih ka tum ang," tiin a sawi a, coach Simone Inzaghi nen an inpawh ṭhat avangin nuam a tih thu a sawi ve bawk.

Serie A champion Inter hi sumah an buai a, an player neih ṭhat pawh an chelh thei lo. Dzeko tan Lukaku hmunruak hnawh khah a harsa dawn a, tlarhnung lamah Achraf Hakimi chan mah se Dumfries an nei ve leh thung.

Netherlands inter-national Dumfries hi PSV Eindhoven atangin season li atan an lalut a, Dutch defender hi Euro 2020 a khelh dan chhut chuan Italian club tan rinrawl ni phak tura ngaih a ni.