Lewandowski goal a tawk zo lo : Haaland erawh chak nan a tawk

Bundesliga season ṭan niah rinlawk ang ngeiin Robert Lewandowski chuan goal a khung lehnghal a, mahse a goal khung hi champion lai Bayern Munich chak nan a tawk zo lo - an mikhualna ramah Borussia Monchengladbach nen 1-1 in an inhnehtawk.

Lewy chauh hi goal thun khawl a ni bik lo, an elpui Borussia Dortmund pawhin striker ṭha mi an nei ve tho. Dortmund hian Erling Braut Haaland-a goal hnih hmangin an mikhual Eintracht Frankfurt chu 5-2 in an hneh thung.

Bayern an chelh
Manager thar Julian Nagels-mann-a'n pre season lamah a naute result ṭha a neih pui thei lo a, inelna tak an hmachhawn hnuah pawh chak nghal hluai ngawt theih a ni bik lo - kum 34 mi manager hian engtiangin nge Bayern a kaihhruai zel dawn tih chu zawhna lian tak a ni nghal.

Zirtawpni zan inkhelah mualneitu Monchengladbach lamin goal an nei hmasa, minute 10-na lekah midfielder Lars Stindl siamsak chu striker Alassane Plea-a'n hma hruaina goal ni turin a khung.

Bayern hian a zawnin season kua zet chu Bundesliga title an la tawh, kum 2012 hnu lamah chuan season tir an match hmasa bera goal an khung hmasak loh vawi khatna a ni, a awmzia chu Bavarians hian league match hawnna inkhelah si an phur hmasa ngai meuh lo.

German champion hian si phur mah se Lewandowski an nei miau a, an phur reng duh lo. Poland international hian chawlhlawk hma deuhin Joshua Kimmich-a corner pet tauh lutin si phurh a sut a, second half lama a hun ṭha neih erawh a chhawr thei tawh bik lo a ni.

Beiseina chu
Point thum hmu zo lo mah se Nagelsmann a zam lo, an khelh dan phung thar chu an thiam bel thuai a beisei. German manager chuan, "Kan bul ṭanna chauh a la nih avangin lungngaih lutuk tur niin ka hre lo, a êng lam kan thlir tur a ni ang.

"Khelh dan phung thar kan nei dawn, chumi tur chuan player zawng zawng an fit em em a ngai. Hmasawnna lai tur leh siamṭhat ngai tam tak a la awm, zawi muangin kan siamṭha zel ang, kan khingpuiin min nawr buai viau chunga kan chiai lo kha a lawmawm," a ti.

Bayern Munich hian an defender David Alaba an chelh thei lo a, Real Madrid lamah a kal. Tawnhriat nei ṭha Jerome Boateng a chhuah bawk avangin tlarhnung hi rem thar an ni a, defender thar Dayot Upamecano-a'n minute 90 a khelh nghal a ngai a ni.

Tlarhma lamah chuan Lewandowski a la rintlak dawn. Season hmasa Bundesliga goal khung hnem ber hian, season hmasa nena chhiar zawmin league match a khelh hnuhnung 11-ah a khung vek, hetih chhunga a goal khung zat chu 18 a ni hem mai!

Hei le Haaland
Goal khat khung pawh thil awlsam a ni lo, mahse rawlthar Erling Braut Haaland tan erawh goal khung loa awm hi thil harsa a ni zawk hial mai thei. Dortmund striker hian goal hnih a khung bakah a ṭhiante khung tur vawi hnih bawk a siamsak.

Norway international hian Marco Reus-a'n Bundesliga goal 100 a khunga tur a siamsak hi assist a neih zinga a hlu pawl a ni ngei ang. German Cup-a harttrick siam tawh bawk hi tun season chu a 'bon' chho dawn tih a chiang.

Season hmasa nena chhiar zawmin Dortmund hian league match riat chhung a zawnin hnehna an chang ta, an record hmasa an nihrual chiah. Jurgen Klopp enkawlna hnuaiah 2011-12 season khan vawi riat an lo chak zawn tawh a ni.

Manager thar Marco Rose-a'n record siam theina hun a nei chho dawn. Kum 21 mi Haaland a neih miau avangin beisei an nei sang ngam ang, inelna hrang hrangah Haaland hian Dortmund tan match 61 aṭangin goal 62 a khung tawh.