Dawhtheih hret a ngai - Nadal

Rafael Nadal chuan inkhel chak viau tawh mah se tennis tournament buatsaih tur chuan an dawhtheih leh rih hret a ngai tih a sawi. Player-te chu zalen taka an zin theih hun nghah a pawimawh tih a sawi bawk.

March thlatir aṭang khan Covid-19 vangin inelna tih tawp lailawk vek a ni, tuna a lan dan chuan July thla chawhnu lam hma chuan tournament khelh tur pawh a awm dawn lo - thla khat aia rei chu an la chawl ngei dawn tihna a ni.

Kum 34 mi Nadal chuan, "Tunah hian New York khawpuiah tennis khel turin i zin duh em tih min zawt ta se la, a chhanna chu ‘duh lo’ tih a ni ang. Mahse thla khat liam hnuah chuan thil hi a la danglam leh thei bawk, sawi lawk a harsa hle," a ti.

Spanish tlangval hi US Open leh French Open nomawi kawltu a ni a, kumina Grand Slam khelh hmabak pahnih la awmah hian a inlan a nih chuan champion ni chungin a khel dawn, mipui hmuh duh leh lawm bik a ni leh ang.

Ruahman lawk dan chuan US Open hi August 31 aṭangin New York khawpuiah khelh a ni dawn, tun thla chhung hian US Tennis Association chuan inelna an kalpui dan tur an ti chiang hman tura ngaih a ni a, inelna neihna khawpui hi hri kai tamna hmun a nih avangin thil a awlsam dawn lo.

Grand Slam vawi 19 champion tawh Nadal chuan, "Hun harsa kan tawn lai hi kan pawm thiam tur a ni, mahni chauh in ngaihtuah loin player dang zawng zawng kan ngaihchan tel a ngai. Ka ngaihdan chuan player-te engthawl leh zalen taka kan zinkual hnuah tournament awm chauh se.

"Tournament reng reng hi 100%-in dik leh felfai ni thei se tih hi ka duhthusam a ni, induhsakna leh chanvo ṭha bik inpek chu a ngai lo. Ngun takin tunlai khawvel dinhmun ka thlir a, tennis khel leh tur chuan dawhthei taka nghah leh rih a ngai," a ti.