Australian GP an neih hmel loh

Formula 1 inelna Australian Grand Prix chu coronavirus vangin ṭhulh lailawk a ni tawh a, Australian Grand Prix Corporation CEO Andrew Westcott chuan season tawp lamah pawh inelna an sawn hi an neih leh hnuhnawh a beisei lo.

March 15, Pathianni khan Australian Grand Prix hi tlan tura tih a ni. Zirtawpni khan tlan chhinna neih tur a ni, mahse an tlan chhin hma darkar hnih lekah inelna an ṭhulh thu hi an puang. McLaren team member zinga mi chuan hri a lo kai tih hmuhchhuah a ni.

Australian GP bakah Bahrain leh Vietnam GP te pawh an tlan thei rih dawn lo a, Sanghai GP pawh a hun sawn a lo ni tawh bawk - inelna hi May thla hma chuan an neih a rinawm tawh loh. Inelna an sawn ho hi season tawp lama neih tura ngaih a ni a, mahse season tih tawp zawk pawh a ni thei.

Andrew Westcott chuan, "Melbourne-a inelna kan nei thei lo kha a pawi, chutihrualin tumah dem theih a ni lo. Intlansiak kan neih loh vang hian F1 lam nena inremna kan neihsa pawh ennawn a ngaih phah dawn, entute mit ti tlai tur a awm loh bakah sum leh pai zawng pawhin channa a ni.

"F1-ah chuan theih loh a awm lo tih hi kan inhnemna a ni ṭhin, season kal laiah pawh ruahmansa ho chu tlan leh vek tum a ni. Mahse, kei chuan hetiang hi a thlen theih ka beisei tawh lo," tiin a sawi.