Juve striker Higuain a inhliam

Ningani khan Gonzalo Higuain chu Juventus training-na hmunah a inhliam a, a chawn hliam hi na tak ni lo mah se Serie A an khelh chhunzawm leh hun a nghawng phak a rinawm.

Turin club Juve chuan thuchhuah siamin, "Gonzalo Higuain chu a chawn dinglam a hliam, a hliam hi na tak niin lang lo mah se endik nghal a ni. Ni rei vak lo hnuah a dinhmun hi chiang taka tarlan theih a ni ang," an ti.

Covid-19 vangin March 9 aṭang khan Serie A an chawl a, tuna an ruahman dan chuan June 17 aṭangin league hi an khel chhunzawm leh ang. League khelh hma hian Italian Cup-ah Old Lady hi an inlan hmasak a ngai dawn.

Serie A club ten May thla aṭangin training an nei ṭan leh tawh a, player inhliam an tam angreng hle. Hliam zingah AC Milan striker Zlatan Ibrahimovic leh Lazio midfielder Sergej Milinkovic-Savic te chu hming langsar an ni.

Serie A match khelh hmabak zawng zawng hi ni 43 chhunga khelh zawh tum a ni. Club pariatin khelh hmabak match 10 an la nei a, a dang zawng chuan hmabak match pakua an la nei; a tlangpui thuin ni thum danah match an khelh zel a ngai dawn.

Juventus chuan a zawna a vawi kua nan champion an tum mek a, league hmahruaitu an ni - pahnihna Lazio nen an inkarah point khat chiah a awm. Juve hian Coppa Italia, Serie A leh Champions League khelh hmabak an la nei.