Bale-a'n EPL lam a hawi lo

Gareth Bale chuan Premier League lama kir leh tumna a nei lo a, tun dinhmunah chuan a khelh mekna Real Madrid-ah a football hun pum hman zawh mai pawh a hreh lo niin a agent Jonathan Barnett chuan a sawi.

Kum 30 mi Bale hi Real Madrid tan player ṭangkai leh thawhhlawk a ni pha. Mahse, Real manager Zinedine Zidane nen an boruak a ṭha vak lo a, Spanish club lian chhuahsan tur angin thawm a nei ngun hle. Chinese club nen pawh indawrna thui tak an nei hman hial.

Amaherawhchu Madrid khawpui a chhuahsan ta lo a, tunah chuan a rilru a nghet leh ta a nih hmel. Barnet chuan, "Madrid khawpuiah a hlim a, nun nuam tak a hmang, he hmunah hian a hun tawp thleng hman a duh loh chhan tur a awm lo.

"World Cup-ah champion chiah lo mah se football-a nomawi chawi theih langsar leh hlu ho chu a hui veka ngaih theih a ni, an chhungkaw tan sum leh pai dinhmun ṭha tak a nei bawk. Real Madrid chhuahsan a duh chhan tur a awm lo ang," a ti.

Wales international forward hian 2013 khan Tottenham aṭangin Real Madrid chu pound maktaduai 85-in a zawm, a hun laia khawvel player manto ber a ni; inelna hrang hrangah match 249 khelin goal 105 a khungsak tawh.

Spain khawpuiah hian Champions League pali, La Liga, Copa del Rey, Club World Cup leh Spanish Super Cup pakhat ṭheuh bakah UEFA Super Cup nomawi pathum a chawi tawh - a sulhnu hnutchhiah hi a nep lo hle.

A chawr chhuahna EPL-ah kir leh tur anga sawi a tam, a club hlui Spurs bakah tun hnaiah chuan Newcastle United nen pawh sawi zawm a ni. Mahse tunah chuan Real Madrid tan a khelh zui a rinawm ta hle.