Coronavirus-in football a nghawng nâ

Hri leng mek coronavirus-in football khawvelah nghawng a nei lian takzet. Infiamna ngainate chuan kartawpa an nghahhlelhna ber inkhel en tur a awm tak loh avangin an hrilh hai a, livescore en theihnaah pawh inkhelh hun sawn tur bak hmuh tur a awm lo.

Europe-a football thuneitu sang UEFA chuan an hnuaia inelna chawlh lailawk a nih thu an puang tawh a, UEFA hnuaia football association tam zawk pawhin an hnuaia inelna an ṭhulh tawh. Heti chung hian Wayne Rooney chuan thuneitu chu an che tlai a tih thu a puang.

England-a football inelna sang chin tawh phawt chu April 3 thleng chawlh a nih thu March 13, Zirtawpni khan FA chuan a puang a, coronavirus dinhmun a zirin Premier League leh inelna dang ṭan hun hi a la danglam thei bawk.

England tana goal khung hnem ber Rooney chuan, "Player, staff bakah kan chhungte tan chuan kar hrehawm tak a ni. Infiamna dang tennis, F1, rugby leh golf te khel lo turin thutlukna an siam a, ram dangah chuan football pawh khelh pawh an chawlhsan. Kan sorkar bakah FA leh Premier League lamah hruaitu ṭha kan nei lo a, chawl turin thutlukna kan siam tlai," tiin a ṭawng na hle.

A ṭan chhan sawi langin Rooney chuan, "Footballer tam takin mahni nunna leh chhungte nunna thapa inkhelh hi kan pawisa hmuh nen hian a inphu chiah em tih kan ngaihtuah nasa. Thutlukna siam turin eng vangin nge Zirtawpni kan nghah kher a ṭul? Thutlukna dik siam turin eng vangin nge Mikel Arteta damloh hriat chhuah kher a ṭul? "Emergency meeting neih hnuah thutlukna dik siam a ni a, khami hma zawng kha chuan England-a footballer-te kha chu vawk ang chauhah min ngai a ni," tiin a sawi. 

Olympiakos club neitu Evan-gelos Marinakis-a'n coronavirus a vei avangin Arsenal leh Manchester City inkhel tur ṭhulh a ni a, hemi hnu pawh hian Gunners leh Brighton inkhel tur chu kaltlangpui tum ni mah se Spanish manager Mikel Arteta-a'n coronavirus a vei tih hriatchhuah a nih avangin an ṭhulh chauh a, Premier League khelh an chawlh rih tur thu an puang zui bawk.

Rooney chuan sawi chhun-zawmin, "Inkhelh a him loh laia min inkhelh luihtir vangin coronavirus hi kai ni ngat ila, keimah vangin ka chhungten kai se thuneitute hi ka ngaidam thei lo ang. Inkhelh leh zel chungchang pawh ngaihtuahzui a ngai khawp ang," tiin a lawm lo hle. Kum 34 mi Rooney hian inkhelh hrim hrim a hreh a ni lo a, coronavirus laka inven a ngaih pawimawh vang zawk a ni. Manchester United leh Everton forward hlui chuan, "A him tawh hnuah chuan September thla thleng pawh season pawt sei se kan khel mai ang. "Player leh entute tana him chhung chuan inkhel turin kan inpeih. World Cup 2022 hi November leh December-a khelh a ni dawn a, hemi atana inpuahchahna ṭha tak a ni thei ang," tiin mihring himna chu a pawimawh hmasak thu a sawi.

Premier League-ah nghawng a nei lian a, Italy lamah nghawng a nei lian lehzual. Juventus defender Daniele Rugani chu Serie A player zinga coronavirus vei an hmuhchhuah hmasa ber a ni a, Cristiano Ronaldo te nen club khata khelh ho a nih avangin a chanchinin sawi a hlawh lehzual.

Southampton tan pawha khel tawh Sampdoria striker Manolo Gabbiadini chuan a vei tih hmuhchhuah leh a ni a, hemi hnu hian Gabbiaddini khelhpui Omar Colley, Albin Ekdal, Antonino La Gumina, Morten Thorsby, Fabio Depaoli, Bartosz Bereszynski bakah club doctor Amedeo Baldari ten an vei tih hmuh chhuah a ni.

Fiorentina player Dusan Vlahovic, Patrick Cutrone leh German Pezzella ten covid-19 an vei tih hmuhchhuah a ni a, Serie A player zingah invenna atana khung hran ṭhahnem tak an awm. Spain lam pawh an him lo - Real Madrid basketball player zinga miin a vei avangin football player zawng zawng pawh an khung hrang. Valencia player panga kai zingah Argentina defender Ezequiel Garay leh Man City player hlui Eliaquim Mangala pawh a tel.

Germany pawh an him lo. Paderborn defender Luca Kilian chu Bundesliga-a covid 19 vei hmuhchhuah hmasa ber a ni a, Hannover defender Timo Hubers pawhin a vei. UEFA chuan vawiin hian ram hrang hrang league leh European competition neih dan tur chungchang relin an ṭhu khawm ang.