Tlai dar 5:30-ah Kashyap-a hoin Aizawl FC

Vawiin tlai dar 5:30 hian Aizawl FC-in coach thar Santosh Kashyap kaihhruaina hnuaiah Indian Arrows an hmachhawn dawn a, Goa-a Tilak Maidan-a inkhel hi Star Sports 2-ah a en theih ang.

Mizo club hian I League bikah match ruk chhung chak hmel an hmuh tawh lo a, table-ah parukna dinhmun an luah phak chauh avangin Portuguese coach Paulo Meneses banin Indian coach Kashyap an lalut a, season tawpa palina nih phak chu an tum tur a ni.

Chona thar
Aizawl FC coach Santosh Kashyap chuan, "Vawi hnih training session ka neihpui a, ka player neihte hi table-a hma min sawn pui thei turte an niin ka hria. Kan khelh hmabak match apiangah theihtawp kan chhuah zel ang a, result ṭha kan neih ngei ka ring," tiin a sawi.

Mizo club hian match 13 lai khel tawh mah se rawlthar ṭha rual awmna Indian Arrows hi vawi khatmah an la hmachhawn lo a, FIFA World Cup Under 17-a India team enkawltu Luis Norton de Matos hnuaia khel Arrows hian foreign player an neih loh avangin team nem zinga ngaih an ni. Amaherawhchu an inkhelhna tur hmun Tilak Maidan hi Mizo club-in Churchill Brothers an hneh lohna hmun kha a ni.

Mumbai FC coach hlui Kashyap chuan, "Ka record in en chuan chona hmachhawn nuam tichi ka ni tih min hria ang a, chuvangin Aizawl FC enkawl hi a phurawm ka ti," tiin chona thar hmachhawn tura a inpeih thu a sawi.

Kum 51 mi Kashyap hian Salgaocar chu tla thei dinhmun aṭangin a chhanhim tawh a, amaherawhchu season liam ta khan Mumbai FC enkawl puiin a chet ṭhat pui lo a, AFC Pro Licence nei coach hian Mizo club hi hming chher ṭhat leh nan hman a tum ang.

Afghan defender Masih Saighani chuan, "Coach thar hnuaiah khelh dan phung thar kan nei a, engkim a kaltluang a, a ṭhat leh ṭhat loh chu kan result-ah a hriat ang," tiin Vanglaini a hrilh ve bawk.

Mi thar?
Aizawl FC-in East Bengal leh Mohun Bagan striker hlui Chidi Edeh lakluh tumin an hel a, amaherawhchu visa a fel theih loh avangin Nigerian striker hi Arrows hmachhawn hunah a la inlan thei dawn lo.

Mizo club hian season ṭantirha player pawimawh H. Lalmuankima chu ISL Club FC Goa aṭangin laklet an tum tih a awm bawk a, Bawngkawn tlangval pawh hi tihfel ngai a la tam avangin vawiin tlai inkhelah chuan a inlan hman a rinawm loh.

Arrows hi
Indian Arrows hi Mizo tlangval Edmund Lalrindika khelhna a ni a, naupang rual awm khawmna ni mah se player tam zawk hi FIFA World Cup Under 17 khel tura uluk zawka hrual an nih avangin an game a puitling hle.

Matos-a hote hian an match hnuhnung berah pawh Churchill Brothers lakah goal khat an phur hnuah injury time-ah substitute Abhijit Sarkar-a goal hnih hmangin an lehthal a, tun hi an phur vanglai tak a ni.

AFC elpui
Aizawl FC hian palina nih phak an tum a nih chuan an elpui tur chu Mohun Bagan a ni a, Kolkata club hian match 14 aṭangin point 21 an hmu.

Mizo club hian match khata khel tlemin Mariners point liin an la pha lo a, lehpel tur chuan an chetsual a thiang tawh lo. Kolkata club hian Pathianni hian champion beiseina la nei Neroca chu Manipur-ah an tlawh dawn a, Gift Raikhan-a hoten point an hmuh theih chuan Santosh Kashyap-a tan hna a awlsam ang.

Bagan hian Neroca bakah Indian Arrows, Churchill Brothers leh Gokulam Kerala te an la an khelhpui dawn. Aizawl FC hian Indian Arrows vawi hnih an la hmachhawn dawn bakah Shillong Lajong, Minerva Punjab leh Gokulam Kerala te an la hmachhawn ang.