Liverpool-in quarterfinal an lut?

Nilai zan khan Porto khelmualah Sadio Mane-a'n Liverpool tan hattrick a siam a, Reds chuan kum kaw hnua Champions League last 16 an khelh leh hmasak berah FC Porto chu khualmualah 5-0 in an sawp.

Liverpool-in FC Porto la mikhual ve leh dawn mah se Portuguese club tan Anfield-a goal nga khung tur chuan thil mak a thlen a ngaih tawh dawn avangin Reds hi quarterfinal lut chiangsaa dah ngam an ni tawh.

Reds tan Mane bakah goal khungtu 'regular' pahnih Mohamed Salah leh Roberto Firmino ten goal khat ve ve an khung ve bawk–Salah-a'n Merseyside club-a a season hmasa bera a goal 30-na a ni a, Firmino tan a goal 21-na a ni bawk.

Liverpool tan kum 2002 khan Michael Owen chuan khualmualah hattrick a lo siam tawh a, Mane hi Owen hnua Europe-a khualmuala Reds player hattrick siam leh thei hmasa ber a ni.

English club zingah Liverpool chuan Champions League nomawi vawi nga chawi tawhin a chawi hnem ber an ni a, Jurgen Klopp enkawlna hnuaiah hei hi belhchhah tumin an bei mek–an tlarhma en chuan he mang ram hi a taka chan tir turin theihna an nei.

Liverpool boss Jurgen Klopp chuan, "Kan khel ṭha takzet a, kan duh ang takin kan khel a ni. Porto kha team ṭha tak an ni a, mah se kan hun ṭha neihah goal kan khung zel avangin kan tifuh a ni," a ti.

Goal nga khung mah se Klopp-a'n quarterfinal erawh a la thlir duh lo. Liverpool boss chuan, "Anfield-a second leg hisap ran chungin he hmunah hian kan khel a, Porto-in beisei an la nei thei tih hrethiam tur khawpin football khawvelah hian ka awm rei ve tawk tawh," tiin a sawi.