Player langsar an tlang

Australian Open champion Caroline Wozniacki chuan German nula Carina Witthoeft hnehin Qatar Open quarterfinal a lut a, Nilaini zan inkhel dangah Simona Halep pawhin world number 1 hnungzuiin Ekaterina Makarova a hneh ve bawk.

World number 1 Wozniacki hian 6-2, 6-0 in hnehna a chang a, winners vawi 18 a vuak theih bakah break point vawi 12 a hmuh zinga a zatve chu a hmangṭangkai thei a ni. Seeded 14-na Magdalena Rybarikova leh Monica Niculescu te inkhela a chak zawk a hmachhawn leh ang.

Seeded pakhatna Wozniacki hian a tournament khelh hnuhnung ber St Petersburg Ladies Trophy-ah quarterfinal a paltlang lo a, tun ṭuma an inkhelh pawh hian set hmasa zawkah a service hloh ve mah se rang takin a insiamṭha thuai a, a chesual nawn lo.

World number 2 Halep-i'n Australian Open hnua a tournament hmasa ber a khel thung a, Romanian nula hian darkar khat leh minute 11 chhungin Makarova chu 6-3, 6-0 in a hneh.

Seeded pahnihna Halep hi awlsam taka chak angin lang mah se set hnuhnung zawkah hian a khingpuiin break point vawi li a hmuh chu a inchhanhim thei a, chumi hnuah erawh harsa lutuk loin game nga a la zawn thei. Halep hian a match lehpekah chuan Anastasija Sevastova a hmachhawn leh ang.

Inkhel dangah Wimbledon vawi hnih champion tawh Petra Kvitova chuan set khat a hloh hnuah Agnieszka Radwanska chu 6-7(3), 6-3, 6-4 in a hneh let thei. Britain nula Johanna Konta pawhin 6-2, 6-2 in Carla Suarez Navarro a hneh ve bawk.