Chelsea khelmualah Hull City

Premier League champion Chelsea-in zanin dar 1:30-ah FA Cup fifth round an khel dawn a, an mikhual tur hi Championship club Hull City an ni. Team pahnih hi an khelh mekna league-ah an talbuai ve ve.

Chelsea-in season ṭan tirah league nomawi humhim an thupui ber laiin tunah erawh Champions League khelh leh khelh loh chu an thupui ber a ni tawh. Hull City-in season ṭantirah Premier League-a kir leh ngei tumin rilru an seng a, tuna an buaina erawh Championship in ham tan a ni–zaninah league lama dinhmun duhawm lo team pahnih an inhmachhawn dawn a, inkhel a hmuhnawm dawn.

Conte a lungawi lo?
Chelsea-in league lamah beisei an phak lo a, hemi boruak karah hian chhuak tur anga sawi Blues manager Antonio Conte chuan transfer bazar-ah an club board thlawpna a hmuh ṭhat tawk loh thu a sawi!

Conte chuan, "Manager ṭhenkhat hian engtinnge player langsar lalut tura an club board an hmin theih dan hi hriat ve ka duh a ni. Player lei turin kei chuan kan hotute ka hmin ve thei lo a, coach dang hnen aṭanga ka inzir a ngai a ni," a ti.

Italian manager hi a demawm loh; Arsenal-in Pierre-Emerick Aubameyang leh Henrikh Mkhitaryan an lalut a, Liverpool-in Virgil van Dijk, Manchester United-in Alexis Sanchez leh City-in Aymeric Laporte te an lalut a, ani lakluh ve erawh Olivier Giroud a ni.

Beiseina
Conte-a'n January-ah a duh ang player leina sum nei lo mah se chanchin lawmawm a nei tawh tho a, chu chu Alvaro Morata dam chian tawh thu hi a ni–Spanish striker awm loh hlanin Blues hian Watford leh Bournemouth an ngam lo a, Alvaro Morata rawn kirna inkhelah West Brom chu 3-0 in an hneh thung.

Nimina club training ground-ah pawh Morata hian a ṭhiante dang ang thoa training neiin a dam chiang tawh tih hmuh theihin a awm a, Hull a hmachhawn ngei a rinawm–Blues hian February 20-ah Barcelona an mikhual dawn avangin Spanish striker hi minute 90 khelhtir a nih erawh a rinawm loh.

Olivier Giroud-a'n Baggies lakah Blues tan a vawi khat nan inkhel bul a ṭan a, a che chhe lo–goal hnih khungtu Eden Hazard goal khung pakhat chu a siamsak a ni a, Morata aiah inkhel bul a ṭan a nih pawhin a mak lo ang.