PSG ngam loh Cristiano Ronaldo
Football khawvelin Nilaini zanah a nghahhlelh inkhel a hmu a, Real Madrid-in Paris St Germain an mikhual - player langsar leh manto rual kara langsar ber chu Cristiano Ronaldo bawk a ni a, Portuguese forward hian goal hnih khungin Real chu 3-1 in hnehna a chanpui.
Santiago Bernabeu-a inkhel-ah PSG tan Adrien Rabiot-a'n goal hmahruai a khung avangin tun season-a beisei phak lo Real ṭantute thin phu a rang hman - mah se ṭum danga anmahni chhanhim ṭhintu Ronaldo bawk a inlar a, Marcelo chuan goal khat a khung ve bawk.
La Liga leh Copa del Rey-a champion beisei tawh lo Real forward Ronaldo-a'n, "Champions League nomawi kan chawi chuan season duhawm tak a la ni thei," tiin a lo sawi tawh a, an beisei ram panin kawng dik an zawh mek.
A la tar lo
Kum 33 mi a ni tawh a, hetiang kum zatah chuan footballer tam zawk an chuai tawh - Ronaldo chungchangah pawh Portuguese forward hi a chuai tawha ngai tam tak an awm.
Mahse, statistics kan en erawh chuan thil dang min hrilh thung - Ronaldo-a'n minute 45-naa penalty hmanga an si phurh sutna goal a khung khan Champions League-a club pakhat tana goal 100 khung tling thei hmasa ber a ni a, Marco Asensio zara a goal hnihna a khung khan tun season CL-ah match sarih aṭangin goal 11 a khungna chiah a ni bawk.
Ronaldo tan chuan Champions League hi tualchaina hmun nuam a ni - a match hnuhnung 12 aṭangin goal 21 ngawt a khung a, Champions League-a season ruk chhung goal 10 chuang khung ziah thei player awmchhun a ni. Real tan goal 101 a khung tawh a, CL-a club pakhat tana goal khung hnem lama amah hnaih bertu Lionel Messi-a'n goal 97 a khung.
Thutlukna dik lo
CIES Football Observatory-in a chhut dan aṭangin PSG hi Manchester City dawta khawvela squad nei manto an ni a, khawvela footballer manto ber pound maktaduai 200 man Neymar an nei bawk - beisei ang ngeiin Bernabeu-ah French club an khel a, Real game press na tak karah an talbuai lo.
An phu ang ngeiin PSG-in hmahruaina goal an khung a, mahse Ronaldo-a'n Real tan an si phurh a sut hnuah PSG coach Unai Emery-a'n an khelmualah an khelh leh dawn avangin goal chhuah tawh loh a finthlakin a hria a, minute 66-naah top scorer Edinson Cavani la chhuakin defender Thomas Meunier a luhtir.
Emery-a'n tlarhnung ven a tum a, Zidane-a'n goal khung a tum thung - Isco la chhuakin Marco Asensio a luhtir a, French manager thutlukna a sual lo. Asensio-a'n goal hnih a rawn thawk chhuak a, Emery-a'n a rilru thlaka attack tura Germany winger Julian Draxler a luhtirin game thlak danglamna hun a awm tawh lo.
Emery a lawm lo
Rabiot-a'n second half-ah Sergio Ramos kut a pet per a, French club-in penalty an beisei laiin referee erawhin a pe lo.
PSG boss Unai Emery chuan, "Ramos handball an tih kha ka hmu lo a, mah se ka nauten chiang taka a kut a per thu an sawi. Penalty a nih chuan referee-in min pe mai tur a ni a, anni lam a pek chuan ti nge min pek ve loh?" tiin referee chungah a lungawi lo hle.
Champions League last 16 aia sang la thleng ngai lo coach chuan, "Real hian CL hnuhnung paliah vawi thum nomawi an chawi a, hnehna chang tura rin hlawh zawk an ni. Mahse, Real hi kan hneh thei tih kan hria a, vawiinah pawh ka naute khan an khel ṭha hle a ni," tiin a sawi.
Ronaldo faktu Zidane
Real boss Zidane chuan, "Nitin mai hian Ronaldo hi chu a ngai reng a, thil ropui tak tak a ti reng mai a ni," tiin goal hnih khungtu a player a fak a, inkhel chungchang sawi nghalin, "Minute 90 chhung kan khel ṭha a ni," a ti bawk.
French manager chuan, "Hnehna ropui tak kan chang a, goal kan chhuah hnua kan pangngai reng kha ka lawmna chu a ni. Mahse, match khat khelh tur a la awm tih kan hre reng tur a ni a, a awlsam dawn lo"
"He club hian European Cup vawi 12 kan chawi tawh a, kan tana Champions League pawimawh zia player-te hian an hria," tiin chawlh a la hun loh thu a sawi bawk.