Tuikual South an chak ve ta

Nilaini zan khan Tuikual South-in Mission Vengthlang Hollow chu 86-71 in an hneh a, Mizoram Super League season linaah an chak vawi khatna a ni.

Hnai si, hla si
MSL-ah a sang paliin semifinal an lut a, table hnuai lama awm team hnihin best of three-in relegation playoff an khel thung a, a chak lo zawk an relegate dawn. A chak zawk pawhin MSL qualifying-a pahnihna nen MSL khel tur an zawng ang.

Table-a palina leh pangana te hi indawt chiahin inrem mah se pakhatin nomawi kawng an zawh laiin pakhat erawh relegate thei an ni. Hei hian MSL match zawng zawng a pawimawh tih a sawifiah chiang hle.

TKS chu
Semifinal lut tura ngaih Tuikual South-in an match hmasa berah Mission Veng Vikings an zuam sual a, an chak zawh loh avangin an talbuai. TKS hian Zarkawt BCA an hneh loh chhunzawm a, knockout stage lut turin chak an mamawh takzet.

Tuikual South-in an match thum­naah MSV Hollow lakah team ṭha zawk an ni tih an lantir a, harsatna hranpa nei loin hnehna an chang. TKS tan Lalnunpuia Renthlei leh Lalmuanpuia Zote ten point 14 ve ve an hmu a, K. Vanlalruata (11 pts) leh F. Zodinthara (10) ten point 10 khung tling bawkin an che ṭha rual a, semifinal an khelh phak an rinawm leh ta bawk.

Amaherawhchu, TKS hian an tlukpui tur team-a ngaih an la hneh lo a, February 20 zana Khatla TBL an hmachhawn hunah fiahin an awm ang.