Premier League TV rights hralh a ni
Football khawvela league ngaihven hlawh ber Premier League TV rights chu hralh a ni - TV rights hi package pasarihah ṭhen hran a ni a, tuna an hralh hi package panga niin package pahnih a la bang.
Package panga hralhna aṭanga Premier League-in sum an hmuh zat hi pound tluklehdingawn 4.464 a ni. Premier League Tv rights hi 2019-2022 chhung atan a ni a, Sky Sports chuan package pali changin hei hian live match 128 a keng tel.
BT Sport chuan package pakhat an chang a, live match 32 an pe chhuak thei dawn tihna a ni. Premier League TV rights awm lai mek hi 2015-19 inkar atan a ni a, pound tluklehdingawn 5.14 man a ni. Tuna rights hi 2019-2022 inkar tur a ni dawn a, package pahnih a la ban avangin deal hmasa zawk hi a khum ngei a rinawm.
Premier League executive chairman Richard Scudamore chuan, "Package pahnih la bang chunga heti zat sum kan huilut thei hian Premier League match hmuhnawm zia a pholang chiang hle a ni," a ti.
BT chuan season tinin Premier League hnenah pound maktaduai 295 (season thum chhung) an chhunluh tur thu an sawi a, chumi awmzia chu match khat chhuahna manah hian pound maktaduai 9.22 an seng dawn tihna a ni.
Sky chuan kum thum chhung atan pound tluklehdingawn 3.579 an seng dawn a, match khat chhuahna atana an sen tur zat hi pound maktaduai 9.3 tihna a ni - an deal neihlai meka match khat pound maktaduai 10.8 aṭanga chhut chuan Sky hi an hlawk nghal.
Package pahnih la bang hi BT Sport chuan an la ngaihven tur thu an sawi a, Sky Sports lam erawh an lan a rinawm tawh lo. Amazon, Facebook, Netflix leh Twitter hming pawh lamrik a ni a, package pahnih hi anni ho hian an inchuh a nih pawhin a mak lo ang.
Amazon hian US Open tennis tournament UK lama tichhuahna rights an lei tawh a, ATP Tour tennis rights an lei tawh bawk.
Facebook pawhin broadcasting lamah sporting market an luhchilh ṭan a, June-a khelh tur ICC Champions Trophy cricket final rights an lei tawh a, Fox Sports nen ṭangkawpin UEFA Champions League match ṭhenkhat chu live stream-in an pe chhuak bawk ang.