Son-a hoin Man City an hneh

Premier League champion, Pep Guardiola enkawl, British player man tam ber kawltu - Manchester City nihna a ni. Mahse maw, a chang chuan football hian thawnthu danglam min hlui fo a nia, rinkai lo zawkin team ṭha zawk zirtirna an pek hlak chang a awm.

Son Heung-min-a goal mawi hmangin Tottenham Hotspur chuan an mikhual Man City 1-0 in an hneh. Pathianni zan inkhelah Spurs striker Harry Kane awm lo mah se Son a awm miau a, manager thar Nuno Espirito Santo nauten an mamawh tawk goal an khung.

Kane awm lo
Tottenham Hotspur Stadium khat tlatin fans an pungkhawm leh thei tawh, fans lam rilru erawh a khingbai deuh. North London club aṭanga chhuah duh Kane chu squad-ah a tel lo a, striker ṭha mi tel loa mikhual thlen chu a kalh a kim lo ngei ang.

England captain Kane a awm loh avangin manager thar Nuno Espirito Santo-a'n tlarhma laiah Son a dah a, a thlawp turin player tlan tam Lucas Moura leh Steven Bergwijn te a sir tawn tawnah an awm bawk.

Nipui bazara pound maktaduai 100 man Jack Grealish chuan Man City tan inkhel bul a ṭan nghal thung - Aston Villa captain hlui hi tlarhma lamah forward pathum Raheem Sterling, Riyad Mahrez leh Ferran Torres te nen an inkawp.

Man City hian kum 10 hnua a vawi khat nan striker Sergio Aguero tel loin season bul an ṭan. Argentina international hi season hmasa lamah pawh chhawr rim a ni tawh lo, tunah a player neih dan thlir chuan an goal thun khawl hi an mamawh vak lo tura ngaih a ni.

Son-a goal
An tih ṭhin dan pangngaiin Pep Guardiola nauten ball an chang tam, mahse Tottenham tlarhnung an talbuai duh lo. Spurs lamin counter attack hmangin an takin an vaw let ṭhin a, forward Lucas Moura leh Son te ball thiamna leh tlan chakna chu an innghahna a ni.

South Korea international Son-a'n box pawn aṭanga hun ṭha a insiam hmasakah a vannei lo, a ball pet chu defender Joao Cancelo-a'n a lo tawk pial zuah, keeper Edenson-a'n ban phak lo mah se goal ban hrulah a kal hlauh.

Second half tir lamah Spurs lamin counter attack bawk an hmang. Benjamin Mendy awmna lamah Son chu tlan tlangin, amah rawn hnaih chilhtu Nathan Ake a paltlang hnuah goal ṭha bik a khung a, City keeper Ederson tan dan theih a ni lo.

Spurs chak theih nan Son pawimawhzia sawi nep theih a nih lo, chutih rualin chau thei lo ang maia tlan tam Moura leh Man City goal nawr lo chhu chat hmiah hmiahtu Japhet Tanganga kha fak tlak an ni bawk.

Tlarhma bil
Guardiola-a'n striker pangngai chhawr loa team rem a ching a, goal khung an theih tho avangin sawisel a hlawh vak lo. Mahse, Spanish manager hian thutlukna siamsual chuang erawh a nei ve fo - Tottenham khelmualah pawh goal hlauhawm tak tia sawi tur an nei hleithei lo.

Sterling, Mahrez leh Grealish tean ball an tlanpui thei viau a, mahse Spurs keeper Hugo Lloris tan hna hautak tak tia sawi tur an siamsak thei lo. Sterling-a cross Mahrez-a'n tlu chunga a pet goal lo erawh an ui ang, goal bul hnai tak aṭangin a thlawh out luah.

Man City hi an ṭhat dan berin an la khel lo tih erawh hriat a ṭha. Hun tawp dawn lamah Kevin de Bruyne, Oleksandr Zinchenko leh Gabriel Jesus te hmel kan hmu chauh a, hliam vangin Phil Foden chu squad-ah a la tel lo bawk - kar khat an training ho leh hnuah an inkhel chu a danglam tawh ang.

Belgium international midfielder Bruyne hi Euro 2020 laia inhliam kha a ni a, striker Jesus pawh Copa America khelh vanga chawlh nei rei a ni - team training an la zawm tlem bakah an la dim deuh bawk, hun tlem a zawng an la mamawh. Rodri leh Bernardo Silva te lut ta se boruak a danglam mai thei.

Tlarhnung lam
Guardiola-a'n tlarhnungah Ruben Dias, Nathan Ake, Mendy leh Cancelo te a remkhawm a, player pali hi Man City player thar ni lo mah se an khelho ngai meuh lo, hliam leh thildang vangin khelmuala an luh a inrual ngai meuh lo.

Mendy hi ball pass thiam bik a ni a, tlarhma pui tura a tlan chhuah tam avangin a dinna lamah a pawp fo, lo hnawhkhattu tur Ake-a'n chiang takin Son a dang hneh lo, goal an chhuah danah chhuanlam an zawng dawn a nih chuan anni pahnih hi puh theih an ni.

John Stones, Aymeric Laporte leh Kyle Walker te chu bench lamah dah an ni a, anni pathum hi rinrawlah a neih ṭhin tawh - in man sa leh khelho ṭhang an ni. Anni hian bul ṭan zawk se result a danglam mai thei, danglam lo thei tho bawk.

Season hmasa Champions League final-ah Pep-a'n player khel tur a thlang sual tawha ngaih a ni a, kuminah pawh a ṭha hlir a neih miau avangin an chak loh ni chuan Spanish manager player thlan dan hi sawi zui hlawh a ni zel dawn niin a lang.

"Season hmasa hun tam zawkah Aguero tel loin kan khel a, goal tam tak kan khung - player ngaite bawk kha an la ni. Tun ṭumah pawh hun ṭha kan insiam thei; Grealish khan a ṭhiante tan goal khung theihna remchang a siam a, kan chak pui thei lo erawh a pawi,"
- Pep Guardiola, Man City Manager

"A makin a ropui, ni duhawm tak a ni. Player zawng zawng an thawkrim hle, an tlan tamin an chiai lo a, hnehna chan tumin theihtawp tak meuh an chhuah. Hmasawnna tur tam tak la awm mah se ka naute khelh danah ka lawm,"
- Nuno Espirito Santo, Tottenham Manager