Federer khup zai a ngai leh dawn

Roger Federer chuan a hun hnuhnung lam a tawng chho mek a, a lo tho chhuak leh thei a ngem tih pawh zawhna lian tak a ni ta. A khup hliam vangin hun rei tak chhung a chawlh leh phawt a ngai dawn, a lo kir hun tur sawi lawk theih a ni lo.

Swiss star hi kum 40 mi a ni tawh, season hmasa pawh kha hliam vangin a lo buai tawh - a khup dinglam vawi hnih lai zai a ni. Season kal laiah a lo kir leh a, a tir lamah ṭha takin khel thei mah se a khup na vang bawkin a buai leh ta a ni.

Grand Slam vawi 20 champion tawh hi Wimbledon 2021 hnuah a la inkhel leh lo - kum tir lama khelh ngei a tum Tokyo Olympic aṭang pawhin a inhnukdawk a, major tournament hnuhnung ber US Open pawh a khel dawn lo.

Federer chuan, "Hun hrehawm leh harsa a ni leh dawn tih ka hria, mahse hrisel tha taka awm ka duh chuan tunah hian ka chawlh leh rih phawt chu a ngai si a ni, ṭha taka ka inkhelh leh theih nan beiseina ka la nei reng.

"Tun ang kum tawha zai tawh chu eng tianga harsa leh khirhkhan nge a nih ang tih pawh ka hria, mahse tun hma pawhin harsatna hrang hrang ka lo paltlang tawh, tunah pawh hian ka paltlang leh theih ka beisei," tiin a sawi.

Grand Slam champion hnem lamah Federer, Rafael Nadal leh Novak Djokovic te an intluk tawk mek, player pathum zinga tu emaw ber hi chu a la champion belh ngei pawh a rinawm - tuna a lan dan chuan Federer tan chuan title lak leh a harsa tawh ang.