Rin hlawh lo Binder a chak

A elpui dangten ruah sur vanga bike ke (tyre) an thlak laiin Brad Binder erawhin 'risk' a la a, a ti fuh hlauh. South African tlangval hian Pathianni zan tir lama tlan zawh tak MotoGP Austrian Grand Prix-ah hnehna a chang.

Red Bull Ring-a intlansiakah kum 26 mi Binder hian 10-na aṭangin inelna a hmachhawn ṭan. Inelna neih laia ruah a sur miau avangin thil thleng thei lo tak tak a awm lo, pakhatna nih tuma inum na tak Marc Marquez leh Francesco Bagnaia te chet fuh loh karah a vannei ta ber a ni.

KTM rider hian bike intlanisakna sang berah inelna vawi 24 a hmachhawn aṭangin a chak vawi hnihna a ni a, season kal lai bikah chuan a vawi khat chakna a ni thung. A hnungah hian Ducati rider pahnih Francesco Bagnaia leh Jorge Martin te an thleng.

Kar hmasa khan tlankawng ngaiah hian inelna an nei tawh, a vawi khat nan Jorge Martin a chak a nih kha - Spanish tlangval Martin hian pathumna dinhmun a luah leh tak avangin theihna a nei sang ve tawk tih a pholang.

Tun season tawp ruala MotoGP chawlhsan tur Valentino Rossi chu pariatnaah a thleng a, Italian rider hian champion beisei ngam tawh lo mah se a hun hnuhnung ṭha taka hman a duh avangin, a sang zual 10 zinga a lang phak hi chanchin ṭha a ni.

Championship lama hmahruaitu Fabio Quartararo chu pasarihnaah a thleng. Yamaha rider hian point 181 nei tawhin a chung berah a la awm chhunzawm, pahnihna dinhmun luahtu Bagnaia-a'n point 134 a nei ve tawh thung.

Austria rama inelna vawi hnih an neih hnuin tunah chuan Britain lam an hawi dawn. August 29, Pathianni hian entu mipui nuai khat chuang awm theihna Silverstone tlankawngah British GP an tlan ang.