Medvedev tan Canadian Open title

Daniil Medvedev chuan Reilly Opelka hnehin Canadian Open title a la, mipa inelna bik hi a hming atan ATP Toronto Masters tih a ni a, world number 2 hian nomawi chawi tur hian 6-4, 6-3 in hnehna a chang.

Russian player Medvedev tan ATP title 12 a lakna chiah a ni a, hnehna chang tur hian darkar khat leh minute 25 bak hun a hmang lo - hard court hi a inkhelh thiamna hmun a nih avangin US Open atan pawh beisei a nei sang dawn.

Canadian Open-ah hian Russian player an hlawhtling khat hle, kum 21 liamta khan Marat Safin a lo champion tawh, ani hnuah chuan Medvedev hi hlawhtlinna chang leh thei hmasa ber a ni hial.

Kum 25 mi Medvedev chuan, "Inelna ka hmachhawn tirh khan final luh ngei tumin rilru ka siam, tunah chuan ka tih hlawhtlin bakah ka champion hial, Masters title lak hi ka tan chuan a hlu bik hle," tiin a sawi, a hmabak chu major title lak tum a ni ang.

US Open inbuatsaihna hnuhnung atan Cincinnati Masters an khel zui leh dawn, hard court inelna tho niin Medvedev hi seeded pakhatna a ni dawn - atan chuan August 30 aṭanga khelh tur US Open atan duhthusama inbuatsaihna hun a awm dawn tihna a ni.

Season hnih liamta kha Canada leh Cincinnati Masters-ah Medvedev hi a zawnin a lo champion tawh, kuminah hun ṭha a nei leh mek. World number 2 chuan, "Player ṭhenkhat an chawl mek a, inelna kan neih leh hunah chuan an lo kir leh tawh ang," tiin a awlsam dawn loh thu a sawi bawk.

Canadian Open-ah hian player langsar - Roger Federer, Rafael Nadal, Novak Djokovic bakah Tokyo 2020 champion Alexander Zverev te an inlan ve lo a, player dang tan champion theihna kawng a inhawng zau hle a ni.