Goal khungtu ropui Gerd Muller 'Mangṭha le'
Germany leh Bayern Munich legend Gerd Muller chu alzheimer natna vangin August 15, Pathianni khan kum 75 mi niin a thi.
Goal khung theih avanga 'Der Bomber' tiha hming lem an pek Muller hi awm ta lo se, khawvel huapa club lian ni pha Bayern Munich hi tun ang hian a ropui lo ang.
Kum 1964 aṭanga 1979 chhung khan Bavarians-in Muller-a ho hian European Cup vawi thum an chawi a, Bundesliga leh DFB Pokal-ah vawi li ve ve an champion bawk.
An dah sang
German Football League (DFL) CEO Christian Seifert chuan, "Gerd Muller ang striker hi an awm leh tawh lo ang. Goal khung thei bik a ni a, ṭhangkhat lian zet mi ṭhahnem tak ngaihsan rawn a ni a, record ṭhahnem tak siamin tun thlengin a record ṭhenkhat chu khum a la ni lo.
"Amah ka hria kha ka inchhuang a, vannei ka inti. A thih thu ka hriat hian hrehawm ka ti. German football Gerd Muller hi kan thinlungah kan chhawm nung reng ang," tiin a sawi.
Bayern CEO Oliver Kahn chuan, "Gerd Muller thih thu hian min ṭhawng tlang hle. FC Bayern legend ropui ber zinga mi a ni a, Bayern leh German football chanchinah hmun pawimawh a chang kumkhua tawh ang," tiin an club legend a thlah.
Bayern president Herbert Hainer pawhin, "FC Bayern tan ni lung-chhiatthlak a nia. Gerd hi striker awm tawha ṭha ber a ni a, pa ṭha tak a ni a, football-ah chuan mi bik a ni. A hming leh a sulhnu hi theihngilh a ni tawh lo ang," tiin a dah sang hle.
Record siamtu
Gerd Muller hi Nordlingen-ah November 3, 1945 khan a piang a, an khaw club TSV 1861 Nordlingen-ah bul a ṭan. Kum 1964 khan Bayern Munich a zawm a, hetah hian club leh ram ti hmingṭhatu dang Franz Beckenbauer leh Sepp Maier te nen an intawng.
Bayern hi season thum chhung a zawnin European Cup-ah an champion a, Muller hian an champion hmasak ber ṭum 1974 final replay leh 1975 final-ah te goal a khung.
Muller hi Bundesliga-ah top scorer vawi sarih a ni thei a, European Golden Shoe vawi hnih a dawng. Bayern Munich tan Muller hian Bundesliga match 427-ah goal 365 a khung a, amah hnaih bertu Robert Lewandowski-a'n match 351-ah goal 278 a khung tawh.
1971–72 season khan league-ah goal 40 a khung a, season liam ta khan Bayern striker Lewy chuan goal 41 khungin a khum chauh. Polish striker Lewy hian goal 40 a khung a, Muller-a record a nih rual hian a kawr hmaah '4ever Gerd' tih inziahna kawr chu a pholang a, Muller thlalak a awm bawk.
Kum 1972 khan Muller-a'n kum khat chhungin goal 85 a khung a, calendar year chhunga goal khung tam ber record a siam. Muller hian goal 85 khung tur hian match 60 chauh a mamawh. He record hi kum 2012 khan Lionel Messi-a'n a rawn khum chauh a ni.
Gerd Müller
Hming Pum Gerhard Müller
Date of birth 3 November 1945
Pianna hun Nordlingen, Allied-occupied Germany
Thih ni 15 August 2021 (Kum 75)
San zawng 1.76 m (5 ft 9 in)
Position(s) Striker
Youth career
1958–1963 1861 Nördlingen
Kum Team Apps (Gls)
1963–1964 1861 Nördlingen 31 (51)
1964–1979 Bayern Munich 453 (398)
1979–1981 Fort Lauderdale Strikers 71 (38)
Total 555 (487)
*Khelh zat leh goal khung zat hi league match bik a ni.
National team
1966 West Germany U23 1 (1)
1966–1974 West Germany 62 (68)
Muller a palian lo
David Winner chuan a lehkhabu 'Brilliant Orange: The Neurotic Genius of Dutch Football'-ah chuan ti hian Gerd Muller chanchin hi a ziak. "Muller hi pa tawi, bing, pian zei leh tlan chak tiha sawi tur a ni lo. Footballer ropui neih tura mitthla ang hi a nei lo. Mahse boruakah a ṭha a, tawite tlan turah chuan rang takin a thleng thei a, goal khung theih bikna danglam tak a pianpui. A tawi avangin a che rang a, a balance ṭhatna leh chet ranna avangin a hmaah awm player-te hi chu a bum mai ṭhin. Goal khung a rem tawh loah te hian goal a khung leh mai."
Ni e, Gerd Muller hi a lan dan mai chuan player ropuia chhiar a har ngei ang. A tlan tam lo a, mahse rang taka hmun tawite a thlen theihna chu chhuan tham a tling. Muller chhuan ber chu a ṭuan ranna leh inthazona a ni a, ball a la hmasa zawk thei zel. Amah aia defender san zawng te hi a zuan khum fo a, Muller hi chu mi bik a ni.
Muller-a khelhpui leh Germany player ropui Franz Beckenbauer chuan, "A chet ranna chu awihawm loh khawp a ni. Training-naah hian kan inhmachhawn fo a, chance ka nei ve ngai lo," tiin a fak hle. Mak ang reng tak chu footballer ropui zingah hian palian lo hi an ṭhahnem hle. Gerd Muller hi 5ft 9in-a sang a ni a, footballer ropui dang Pele (5 ft 8 in), Diego Maradona (5 ft 5 in) leh Lionel Messi (5 ft 7 in) te hi amah aiin an la tawi zawk.
Chawimawina
Bayern Munich
Bundesliga: 1968–69, 1971–72, 1972–73, 1973–74
DFB-Pokal: 1965–66, 1966–67, 1968–69, 1970–71
Regionalliga Süd: 1964–65
European Cup: 1973–74, 1974–75, 1975–76
European Cup Winners' Cup: 1966–67
Intercontinental Cup: 1976
West Germany
FIFA World Cup: 1974
UEFA European Championship: 1972
Mimal Chawimawina
Ballon d'Or: 1970
Footballer of the Year (Germany): 1967, 1969
Voted best Player 40 Years Bundesliga 1963–2003
kicker Bundesliga Team of the Season: 1968–69, 1969–70, 1971–72, 1972–73
Bundesliga Top Scorer (Kicker-Torjägerkanone): 1967, 1969, 1970, 1972, 1973, 1974, 1978
European Golden Shoe: 1970, 1972
FIFA World Cup Golden Boot: 1970
FIFA World Cup Bronze Ball: 1970
FIFA World Cup All-Star Team: 1970
UEFA European Championship Top Scorer: 1972
UEFA European Championship Team of the Tournament: 1972
European Cup Top Scorer: 1973, 1974, 1975, 1977
FIFA Order of Merit: 1998
FIFA 100: 2004
Golden Foot: 2007, as football legend
Bravo Otto: Gold award: 1973, 1974; Silver award: 1975; Bronze award: 1972, 1976
IFFHS Legends
Bayern Munich All-time XI
1974 World Cup final-a chakna goal khungtu
West Germany-in 1974 World Cup khan nomawi an chawi a, final-a chakna goal khungtu chu Gerd Muller hi a ni. Muller hian sulhnu chhinchhiahtlak ṭhahnem tak a nei a, chutihrualin Netherlands laka a goal vang ringawt pawh hian Germany tan chuan 'rohlu' a tling.
Netherlands-in manager Rinus Michels hnuaiah total football an larpui a, Johan Cruyff leh Johan Neeskens te hmangin football mawina an pholang. 1974 World Cup-ah pawh hian Oranje hi champion tura rinkai an ni a, chutihrualin inelna thlengtu West Germany-ah hian Franz Beckenbauer, Uli Hoeness, Berti Vogts leh Muller te an awm.
Munich-a entu 75,200 hmaah Neeskens-a'n minute hnihna lekah penalty hmangin a khung a, Paul Breitner hmangin Germany-in minute 25-naah penalty hmang vekin an sut. Minute 43-naah Muller hian vei lam aṭanga a ball hmuh chu hnung lamah a la per a, rang taka insiamremin goal-ah a pet nghal. Netherlands goalkeeper Jan Jongbloed-a'n goal hi a en liam a, a che lo hrim hrim.
Muller hian 1974 World Cup-ah hian goal li a khung a, top scorer ni lo mah se goal pawimawh a khung. Chutihrualin 1970 World Cup-a pathumna an nih ṭumah erawh match ruk lekah goal 10-ah a khung a, top scorer a ni chiang hle.
West Germany-in 1972 Euro C'ship-a nomawi an chawi ṭumah pawh Muller hi player pawimawh a ni a, final-a Soviet Union 3-0 a an hneh ṭumin goal hnih a khung. Hei chauh hi a ni lo, Euro 1972-ah Muller hian goal li khungin top scorer a ni a, team of the tournament-ah thlan a ni bawk.
Muller hian ram tan match 62 a khelah goal 68 a khung a, a record hi Miroslav Klose khan a khum chauh. Kum 43 mi Klose erawhin ram tana goal 71 khung turin match 137 a mamawh thung. Gerd Muller hnuaiah hian Lukas Podolski (49), Rudi Voller (47), Jurgen Klinsmann (47), Karl-Heinz Rummenigge (45), Uwe Seeler (43) leh Michael Ballack (42) te an awm a, tuna khel laia goal khung tam ber chu Thomas Müller niin ram tan goal 39 a khung tawh a ni.
