Messi tel lohna Barca an chak nghal

Lionel Messi awm loh hnua league match an khelh hmasak berah Barcelona an chak nghal a, an mikhual Real Sociedad chu 4-2 in an hneh.

Catalan club tan Martin Braithwaite chuan goal hnih a khung a, Gerard Pique leh Sergi Roberto ten goal khat ve ve an khung bawk - Sociedad tan Julen Lobete leh Mikel Oyarzabal ten goal khat ve ve khung mah se awmzia a nei phak lo.

Barcelona tan player thar Memphis Depay leh Eric Garcia te chuan inkhel bul an ṭan nghal a, Sergio Aguero erawh hliam vangin squad-ah pawh a la awm rih lo - mahse, Braithwaite a awm a, Barca an chak.

Catalan club chak zanah Atletico Madrid chuan 2-1 in Celta Vigo an hneh ve bawk a, Inrinni zanah Real Madrid an chak tawh bawk - tun season-a inel ber tura ngaih club pathum an chak vek tihna a ni.

Nghilh har Messi
Barcelona fan-ten an player neih tawha ropui ber Lionel Messi an theihnghilh thei lo a, club inrelbawlna fel tawk loh avanga an chân tak player hian an thinlungah hmun a la chang reng tih Nou Camp-ah an lantir.

Nou Camp-a inkhelah hian fans 22,000 chuan a hmunah inkhel an en thei tawh a, inkhel entu fans zinga a tam zawkin Messi jersey an ha a, minute 10-naah Messi hming lamin an au rual bawk.

Minute 10-na kher fan-te an au rual chhan hi Messi-a'n Barca-ah jersey number 10 a hak ṭhin vang a ni a, mi tam takin khawvel footballer piang tawh zinga ropui ber ang hiala an ngaih hi Barca fan-te thinlungah a la thi lo.

Barca fan-te lunglen hnem turin minute 19-naah Messi ṭhianpa Pique a inlar a, player thar Depay-a freekick aṭanga ball kal chu Spanish defender hian a tauh lut - Nou Camp an nui ve leh ta.

Messi aiah Braithwaite
Barca fan-ten Messi theihnghilh turin hun an mamawh ang tih chu hriat a ni a, season tina goal 30 chuang khung ziah player thlak hi thil namai a ni dawn lo - a thlak zo an awm kher lo thei bawk.

Pathianni zan La Liga bikah erawh Barca tan Braithwaite-a'n Messi hmun ruak a hnawh khat a, Danish striker hi Messi nen engtikawng zawng maha khaikhin chi ni lo mah se Sociedad lakah erawh a hna a hlen ṭha hle.

Kum 30 mi forward hian vanneih vanga Barca player a ni lo tih pholangin first half hun pek belhah Catalan club goal hnihna a khung a, second half minute 59-naah goal thumna a khung leh bawk.

Denmark tana Euro duhawm tak hmangtu striker hian season hmasa khan Barca tan inelna hrang hrangah match 42 khelin goal sarih a khung a, Catalan club meuha khel phak forward record a tan a ropui lo - kuminah season hmasa aia tam zawk khung a tum ang.

Beiseina
Barcelona-in 3-0 in hma an hruai a, awlsam takin an chak dawn niin a lang hman. Mahse, hun tawp hnaih lamah Sociedad-in beiseina thar an insiam a, Lobete chuan minute 82-naah si phurh a rawn sut ṭhen.

Lobete hi Spanish winger niin Sociedad academy chhuak a ni a, senior team tana a match hmasa berah Barca hmachhawnin goal a khung nghal a, kum 20 mi lek a la nih bawk avangin hmabak a nei êng hle.

Barca an insiamrem hman lo. Minute thum a liam a, Spain tana Euro leh Olympic-a feh chhuak Oyarzabal chuan a la chau lo tih pholangin goal khat a rawn khung ve leh a, 3-2 a nih tak avangin beiseina an nei thar.

Mahse, Barca-in Braithwaite an nei a, Danish striker hian hun pek belhah Roberto khung turin a siamsak - hun a tawp zui a, Braithwaite-a'n goal hnih leh assist pakhat a nei a, Danish player zinga La Liga match khata goal hnih khung thei hmasa ber a ni.