Mizoram khingpui tur Punjab

Hero Junior National Football Championships for BC Roy Trophy-ah Punjab chuan final thleng turin nimin khan West Bengal 1-0 in an hneh a, final-ah Mizoram an hmachhawn ang. Nomawi inchuhna hi February 6, Ningani hian JN Stadium, Shillong-ah khelh a ni ang.

Nimin semifinal hnuhnung zawkah team pahnih an inhnehtawk a, Punjab tan Seilenthang Lotjem-a'n minute 37-naah goal awmchhun a khung. Mizoram coach Vanlalpeka Ralte chuan, "Semifinal lut chin hi chu team ṭha tak vek an ni a, kan hneh tak Meghalaya leh West Bengal te pawh champion tur khawpa team ṭha an ni. Punjab team khelh danah football academy naupang an ni tih a hriat a, tawh an khirh khawp ang," tiin Vanglaini a hrilh.

Punjab hian West Bengal laka hnehna chang tur hian vanneihna an mamawh a, Seilenthang Lotjem ball pet chu West Bengal keeper Sayan-a'n ho takin a chhuah.

Chutihrualin Punjab forward Lotjem hian tun inelnaa Punjab goal kua khung tawh aṭanga goal sarih a khung avangin player ṭha tak a ni tih erawh a hriat theih thung.

BC Roy Trophy-ah hian Mizoram leh Punjab hi an inhmachhawn thei hle. Nikum khan Mizoramin final-ah Punjab 2-1 in an hneh a, 2015-16 leh 2016-17 ṭumah hian Punjab hian final-ah Mizoram an hneh ve ve. Hei chauh hi a ni lo - 2003-a Mizoramin nomawi an chawi hmasak ber pawhin semifinal-ah Punjab an hneh.

Mizoram manager Hming-thansanga chuan, "Punjab nen hian kan inhmachhawn ngun ta khawp mai. Tun ṭuma kan inmachhawn leh tur pawh hi a phurawm viauin ka hria.

Mizoram team ka enkawl ṭumah chuan semifinal leh final-ah kan hneh a, chutihrualin Bhilai-a final khelhah khan 3-0  in an kan hneh lo," tiin Vanglaini a hrilh.