Italian FA-in Euro 2020 sawn an duh

Italian Football Fede-ration (FIGC) chuan an ram league Serie A an zawh theih nan June 12 - July 12 chhunga neih tur 2020 UEFA European Football Championship khelh hun sawn an duh.

FIGC president Gabriele Gravina chuan, "UEFA hnenah European Championship khelh hun sawn turin ngenna kan siam ang. Club-te'n league atana an sum hman nasatzia leh an inpekna thlir hian season hman zawh ngei hi kan duh dan a ni," tiin coronavirus vanga buaina hmachhawn dan tur a sawi.

UEFA chuan a hnuaia member 55 te chu vawiin hian video conference meeting a neihpui dawn a, meeting-ah hian European Club Association leh European League-a thuneitute bakah world players' union FIFPro aiawhte sawm an ni. Ram hrang hrang league kal zel dan tur, European competition (Champions League leh Europa League) bakah Euro 2020 kalpui dan tur chungchang an rel dawn.

Italian Football Fede-ration hian Serie A zawh theih loh an hlauh thu sawi tawh mah se a zawh theih dan tur kawng an dap. Gravina chuan, "Training hun chhung dah ṭha ila, May thla tirah inelna ṭan leh thei ilang chuan June 30-ah chuan kan zo thei ang. Tunah erawh player-te hi an inah awm se an taksa leh rilru an tih hahdam a ṭul a ni," tiin inelna zawh theih dan a awm thu a sawi. Pathianni khan Italy ramah coronavirus vangin mi 368 an thi a, ram pakhat chhunga ni khata thih tam ber ṭum record a ni.