AFC Cup khel tur Bengaluru

Indian club ṭha Bengaluru FC chuan Asia khawmualpuia club inelna sang ber dawttu AFC Cup an khel dawn a, group stage khel tur hian playoff-ah Club Eagles chu 1-0 in an hneh.

Bangalore club tan nipui transfer-a an lakluh thar Jayesh Rane chuan goal awmchhun hi a khung a, Aizawl FC midfielder hlui goal chhanletna hi Maldives club ṭha Club Eagles lamin an nei lo.

Bengaluru coach Marco Pezzaiuoli-a'n playoff-ah inringtawk takin player thar pasarih a enchhin a, a tisual lo - Brazil defender Marco Alan Costa, East Bengal aṭanga an lakluh Sarthak Golui, Kerala Blasters aṭanga an lei defensive midfielder Rohit Kumar, Real Kashmir attacking midfielder Danish Farooq, season hmasa I League top scorer Bidyashagar Singh leh B team player Sivasakthi Narayanan te a luhtir.

Maldives National Stadium, Malé-ah hnehna an chan avangin Bengaluru hi AFC Cup group D-ah an awm dawn a, Indian club ATK Mohun Bagan, Maldives club Maziya S&RC leh Bangladesh club Bashundhara Kings te nen an awm ho ang.

Nilaini zanah Bengaluru hi an inlan nghal ang a, Bagan nen Indian derby an khel ang. Bashundhara (August 21) leh Maziya (August 24) ten an chhunzawm leh dawn a ni.

Mohun Bagan-in Bengaluru an hmachhawn zawhah Maziya (August 21) leh Bashundhara (August 24) an hmachhawn zui ve leh dawn - Bashundhara hi Bangladesh champion an ni a, Sporting Goa leh Mumbai FC coach lo ni tawh a, Mumbai City-a assistant coach hna thawk tawh ni bawk Óscar Bruzón-a hnuaiah an khel.

Group D aṭang hian group hmahruaitu chauh an tlang dawn a, point hmu sang ber chu Inter-zone play-off semi-final an lut ang - an chak chuan Inter-zone play-off final an khel leh ang a, heta chak hian final an lut ang. AFC Cup hi inelna dang anga kalpui a ni lo a, zone angin kalphung hi siam a ni.

AFC Cup-ah hian Bengaluru hi Indian club zinga record nei ṭha ber an ni a, kum 2016 khan final an lut a, kum 2017 khan Inter-zone play-off final (semifinal tlukpui) an lut bawk.

Dempo (2008) leh East Bengal (2013) te chuan semifinal an lo lut ve tawh bawk a, Mohun Bagan-in an thlen san berah kum 2016 khan round of 16 an lo lut ve tawh thung.