Canada-ah Giorgi a champion

Canadian Open hi mipa leh hmeichhe inelna an khelhna hmun a inang lo a, a hming an ti danglam ṭhin. Hmeichhe inelna National Bank Open final-ah Camila Giorgi chuan chak zawk tura ngaih Karolina Pliskova chu 6-3, 7-5 a hnehin a champion.

World number 71 daih a nih avangin Giorgi hian rin a hlawh lo, a ranking thlir chuan thil mak a ni hran lo. Mahse, a service a ṭhat bakah a tih sual tlem zawk miau avangin inkhel pawimawhah hnehna a chang - WTA 1000 final a khelh hmasak berah a chak nghal.

Giorgi hian a match hmasa lamah world number 9 Elise Mertens, number 7 Petra Kvitova leh rawlthar duhawm Coco Gauff te a hneh thei vek a, inelna a hmachhawn dan thlirlet chuan nomawi chawi phu bera chhal ngam a ni.

Kum 29 mi Giorgi chuan, "Chhungrilah ka lawm, ka lawmna hi sawifiah chi pawh a ni lo. Ka naupan lai aṭangin nomawi hlu tak chawi ve hi ka chak ṭhin, hun rei tak chhung tennis khel tawh mah ila ka duhthusam hi a thleng nghal mai lo.

"Beidawng duh loin ka khel zel a, rei tak ka nghah hnuah hlawhtlinna chu a lo thleng ve ta, ka tan chuan tournament tir aṭanga a tawp thleng hian a mak vek mai," tiin a sawi a, lawm avanga a mittui luang chu a dang zo lo.