Champion Atletico an chak

La Liga champion Atletico Madrid-in tun season-a an league match hmasa berah hnehna an chang nghal a, an mikhualna ramah Celta Vigo chu 2-1 in an hneh.

Atletico tan Angel Correa chuan minute 23-naah goal hmahruai a khung a, La Liga champion hian harsatna nei loin point thum an hawn mai dawn niin a lang hman.

Mahse, Atletico tan Iago Aspas chuan minute 59-naah penalty aṭangin si phurh a sut a, Atletico an talbuai hman - Mahse, Argentine forward Correa-a'n khelmuala a luh chhan a tih chhunzawm a, minute 64-naah Celta phur lutuk tur beng daih nan goal hnihna a khung.

Celta Vigo tan Aspas chuan point hlawhchhuahna remchang a nei a, mahse, kum 34 mi striker hian goalkeeper Jan Oblak a tlan hel hnuah goal ruakah a khung thei lo.

Atletico tan player lakluh thar Rodrigo De Paul chu bench aṭanga luhtir a ni a, Copa America khel chau Luis Suarez pawh minute 65-naah luhtir ve chauh a ni.

Team pahnih inkhel boruak a 'hot' a, hun pek belhah Hugo Mallo-a'n Luis Suarez a rah luih avangin buaina a chhuak a, Mallo bakah hian Atletico defender Mario Hermoso te chu hnawhchhuah an ni a, yellow card pariat ngawt phawrh a ni bawk!