Barca tana inpumpek Pique

Pathianni zan La Liga-a Barcelona an inlan hmain an player tharte an chhawr theih dawn leh dawn loh chu inhnialna ber a ni a, Spanish football titi a luah hneh hle.

Barca hian leiba an ngah avangin an player lakluh tharte pawh squad-ah an ziak lut thei lawk lo a, Messi an chân chhan pawh La Liga danah hlawh sen phal chin an pel dawn vang a ni ber.

Mahse, Pathianni zan an inkhelh hmain Barca-in chanchin lawmawm an nei a, chu chu Gerard Pique-a'n a hlawh tihhniam a pawm thu a ni.

Barcelona chuan thu-chhuah siamin, "Memphis Depay, Eric Garcia leh Rey Manaj te chu La Liga khel tura ziah luh an ni ta a, hetianga kan tih theih chhan hi vice captain Pique-a'n tam tham taka a hlawh tihhniam a pawm vang a ni," an ti.

Depay leh Garcia hi nipui transfer-a Barca player lakluh thar an ni a, Rey Manaj hi B team aṭanga senior team tana khel tur an ziah luh thar a ni thung.

Barca chuan Pique bakah hian an player pawimawh Sergio Busquets leh Jordi Alba te chu inbiakna an neihpui mek thu an sawi bawk a, anni pawh hian an hlawh an tihhniam ve ngei a rinawm.

Pique chuan, "Hlawh tihhniam ngei hi a ngai a ni. Player dang pawhin an tihniam ve vat dawn a, kan hun tawn avangin a ti hmasa berah ka ṭang chauh mai zawk a ni.

"Captain dang pawhin club-in insiamrem a mamawh dan a zira insiamrem hi chu an duh sa a, kan thutluknaah hian kan lawm a ni," a ti a, club harsat laia pui theitu an ni chu lawmawm a tih thu a sawi.

Barca hian captain pali an nei - Busquets chu captain ber a ni a, Pique hi Vice a ni. Sergi Roberto chu 3rd captain a ni a, Jordi Alba hi 4th captain a ni - Roberto hming lam rik ni lo mah se Pique-a thusawi aṭang chuan a hlawh a tihniam ve dawn niin a lang.

Hetihrual hian Alba chu hlawh tihniam ve duh lo anga sawi thawm a awm a, hei vang hian Nou Camp-a inkhelah pawh lawm a hlawh lo hle.

Mahse, kum 32 mi Alba chuan, "Club pui tur hian ka inpeih reng a, club tana ka inpeknaah hian rinhlelh tur a awm lo. Kum 10 chhung zet senior team-ah ka khel tawh a, youth team-ah kum riat ka awm tawh bawk.

"Hei hi ka in a ni a, ka club a ni a, pui turin ka inpeih reng a ni," a ti - khelmual chhung leh pawnah Barca inthuamṭhat hna an thawk mek zel e.