La Liga-ah Eric Lamela a vul

Tottenham Hotspur-in Spanish forward Bryan Gil an leina man atana kal tel Erik Lamela-a'n player mana kal tel tir mai mai chi a ni lo tih a pholang a, Sevilla tana a match hmasa berah goal hnih a khung nghal.

Spurs sawmna hnartu Julen Lopetegui enkawlna hnuaiah Sevilla-in 3-0 in Rayo Vallecano an hneh a, goal hnih khungtu chu Spurs duh loh Lamela a ni.

Argentine forward hian La Liga-a tlangnel turin hun a mamawh tam lo hle - second half-ah bench aṭanga luhtir a ni a, minute 55-naah goal a khung nghal.

Lamela hian a duhtawk mai lo - minute 79-naah a goal hnihna a khung lehnghal a, Sevilla-in lalut fuh an inti tawh khawp ang.

Tottenham player man to ber pawh lo ni tawh Lamela hian season hmasa khan Spurs tan league match 23 khelin goal khat a khung a, Sevilla tan league match khat chiah a la khel chungin season hmasa aiin league-ah a khung hnem tawh zawk tihna a ni!

Sevilla tan an striker chhuanvawr Youssef En-Nesyri chuan minute 19-naah penalty hmangin goal hmahruai a khung a, Moroccan striker penalty hi Zinedine Zidane-a fapa Luca Zidane chawi a ni thung!

La Liga kaithar Rayo goalkeeper Luca Zidane hian midfielder Oussama Idrissi chu titluin goal khungna remchang a neih chu a thlawn a chantir a, penalty a chawi bakah hnawhchhuah a ni.