Marsch hnuaiah Leipzig an chak lo

RB Leipzig-in Jesse Marsch hnuaia an Bundesliga match hmasa berah Mainz an hmachhawn a, 1-0 in an chak lo. Pathianni zan inkhela goal awmchhun khungtu hi Moussa Niakhate a ni.

Mainz goal bawh a na nghal a, Leipzig defender Nordi Mukiele chetsual an vanneih pui bawk. Minute 12-na lekah Mukiele ball pet sual chu Niakhate-a'n goal bul aṭangin awlsam takin a khung.

Leipzig-in Marcel Sabitzer, Dominik Szoboszlai leh Hee-Chan Hwang te luhtirin siphurh sut tum mah se mipui thlawpna hmu ṭha Mainz an ṭang tlang a, point thum hlu tak an hlawh chhuak.

Leipzig hian season liam taa pahnihna nihpuitu Julian Nagelsmann chu Bayern Munich laka an chan avangin Red Bull Salzburg aṭangin Jesse Marsch an lalut. Kum 47 mi Marsch hian RB Leipzig-ah assistant manager hna a thawk tawh a, Salzburg-ah head coach hna chelh tura a kal hnuah head coach hna chelh tur bawkin RB Leipzig-ah hian a kir a ni.