Goal ruk a lut, Hammers an chak

Pathianni zan khan St James Park-ah Newcastle United leh West Ham United te an inhmachhawn a, mualneitu hian ṭum hnih hma hruai mah se Hammers 4-2 in an chak.

Newcastle striker Callum Wilson chuan minute ngana lekah a tauh goal nghal a, minute 18-naah Hammers wing back Aaron Cresswell cross chu a goal a, 1-1 a ni. First half-ah Newcastle-in hma an hruai leh a, vei lam aṭanga Matt Ritchie cross chu Jacob Murphy-a'n minute 40-naah a tauh goal.

David Moyes-a'n halftime a hmang ṭha a, second half-ah Hammers an chungnung. West Ham forward Michael Antonio cross chu Said Benrahma-a'n minute 53-naah a tauh lut.

Hammers forward Antonio-a'n goal ban a tauh per a, hemi per hi Pablo Fornals chuan Murphy laka penalty hlawhchhuah nan an hmang. Antonio-a penalty pet chu keeper Freddie Woodman-a'n dang mah se a per chu Tomas Soucek-a'n a khung.

West Ham forward Antonio-a'n ama pualin goal a khung a, minute 66-naah Benrahma aṭanga a ball hmuh chu kawh zetin a pet goal. Hammers-in Premier League match hmasa berah 4-2 in Newcastle an lehthal a, point thum hlu tak an hlawh chhuak.

Premier League kar hmasa berah match 10 a awm a, inhnehtawk a awm miah lo - team 10 an chak a, team 10 dang an chak lo. August 21, Inrinni aṭangin Premier League inkhel thlir tur a awm leh dawn a, Newcastle-in zan dar 7:30-ah Aston Villa an hmachhawn dawn. Hammers-in August 23, Thawhṭanni zan dar 12:30-ah Leicester City an hmachhawn thung ang.