MSL league round kharna Khatla TBL vs Ramhlun SC

Mizoram Super League season 6 kal lai chu zanin dar 7:30 hian league round hmawr bawkna neih a ni dawn a, vawi hnih champion tawh Khatla TBL leh kai thar Ramhlun Sporting Club te an inhmachhawn ang.

Inelna hi Hawla Indoor Stadium, Republic Vengthlangah neih a ni dawn. Mizoram State Sports Council thu chhuak angin a hmunah fans tan a en theih loh; Zonet HD, Zonet Rihnim leh Zonet YouTube aṭangin live a tih chhuah a ni thung dawn a ni.

MSL season hmasa pahnih champion TBL hian kuminah inelna bul an ṭan fuh, an match hmasa pahnihah Chanmari Vikings leh Chawnpui Basketball Club te an hneh thei. Mahse, Zarkawt BCA leh Tuikual South te a zawna an ngam loh avangin pathumna an ni mek.

TBL coach Lalrinzuala chuan, "Team tin mai hi TBL an hmachhawn chiah hian an ṭang zual ṭhin ni maiin ka hria, an khel ṭha em em vek zel. Keini lam chuan team dang hneh turin theihtawp kan lo chhuah ve thung ang," tiin Vanglaini a hrilh a, a nauten tih sual an ngah ṭhin chu siamṭhat theih a in beisei thu a sawi bawk.

Kai thar Ramhlun hian khelh ṭhat em em ni lo mah se team lian pawh an khel thei viau zel thung. Match li an khelh tawh zingah Tuikual an hneh theih avangin semifinal beiseina an la nei, a sang pali zinga tel tur erawh chuaan TBL hneh a ngai.

MSL-ah hian team paruk an inel, a sang paliin semifinal an khel dawn a, a hniam pahnihin relegation playoff an khel thung ang. Nizan khan Chanmari Vikings leh Tuikual South an in hmachhawn a, result kan hre hman lo.

Coronavirus hri lengin tual-chhung infiamna pawh a nghawng buai phak, tournament neih dawna ruahmansa 'All Star Game' chu neih theih a ni dawn lo a, inelna neih hun chhung pawh tih tawi niin March thlaah a hmawr bawkna neih a ni ang.