NCA camp-ah Mizoram player panga

India rama cricket thuneitu sang Board of Control for Cricket in India (BCCI) hnuaia All India Senior Selection Committee chuan National Cricket Academy(NCA) zawm tur player a thlang chhuak leh a, an zingah hian Mizoram player panga an tel.

NCA Men Senior Camp hi April 6-30 chhung hian Guwahati-ah neih a ni dawn a, hmar chhak state hrang hrang aṭangin player pahnih zel koh an ni ṭhin. Tun ṭumah hian Cricket Association of Mizoram (CAM) player ten duhsak hlawhin mi panga koh an ni.

Camp-a tel tur hian player hmabak nei eng leh che ṭhate koh an ni ṭhin a, an thiam thil neih bik leh hmasawn an ngaihna lai kawng hrang hrangah zirtirna ṭha zawk an dawng ang. Thlan bik ni tur hian ram pum huap inelna lama an sulhnu bakah tualchhunga an chet dan thlengin uluk taka zir chian hmasak an ni ṭhin.

NCA Camp zawm tura thlante

#    Player    Khua/Veng

1    Lalbiakvela    Luangmal

2    Parvez Ahmed    Zotlang

3    Sumit Lama    Khatla

4    K. Lalhmingmawia    Armed Veng

5    Saidingliana Sailo    Siaha