Messi dan theih a ni lo - Deco

Barcelona tana Lionel Messi khelhpui ṭhin Deco chuan Argentine forward dang turin ruahmanna siam lawk theih a nih loh thu a sawi a, "A tlachawpa chet mai loh chu tih theih a awm lo," a ti!

Player pahnih hian 2004-05 season khan Barca tana an season hmasa ber an hmang a, an pahniha an khelh dun chhung hian Catalan club-ah La Liga (2), Spanish Super Cup (2) leh Champions League (1) nomawi an chawi hman.

Barcelona tan match 161 khela goal 22 khungtu midfielder chuan, "Eng team pawh ni la, in player zingah Messi a awm a nih chuan in khingpui turte lakah in chungnung sa tihna a ni," a ti.

Portugal international hlui chuan, "Messi hi goal khungtu a ni mai lo a, goal siamtu a ni a, khingpuite tlarhnung inremkhawm dan chu a ṭhiat darh ṭhin"

"Miin Messi a hmachhawn reng rengin thil awlsam a ni ngai lo a, a khelh dan tur rinlawk theih a ni ngai lo. A mal anga ball inchuhin a chet dan tur hriat theih a ni lo a, a ball pass dan tur lah rinlawk theih a ni lo," tiin a ṭhianpa chu a dah sang hle.

Zanin dar 8:45-ah Barcelona hian Eibar chu La Liga match khel turin an lenchilh ang.