Angelique Kerber lakah Johanna Konta a tlawm

World number 1 hlui Angelique Kerber chuan Qatar Open quarterfinal thleng turin Johanna Konta chu 1-6, 6-1, 6-3 in a hneh.

Ningani zan inkhelah seeded 10-na Kerber hian bul a ṭan fuh lo hle, game hmasa panga a la lo vek a, minute 37 chhungin set hmasa ber a hloh.

Amaherawhchu, set hnihnaah a insiamṭha nghal. Kum 30 mi Kerber hian minute 28 chhungin set hnihna a lalet a, set hnuhnung berah pawh a service hum chho zelin hnehna a chang thei.

Grand Slam vawi hnih champion tawh Kerber hian semifinal lut tur chuan world number one Caroline Wozniacki a paltlang leh a ngai dawn. Seeded pakhatna Wozniacki hian Monica Niculescu chu 7-5, 6-1 in a lo hneh ve bawk a ni.

Inkhel dangah US rawlthar duhawm Catherine Bellis chuan champion lai leh seeded pangana ni bawk Karolina Pliskova chu darkar khat leh minute 36 chhungin 7-6 (7-4), 6-3 in a hneh bawk.

Kum 18 mi Bellis hian a khingpui Pliskova service hi vawi nga a chhuhsak thei a, player langsar leh world number 10 chin lakah a vawi khat nan hnehna chang ve chiah a ni.

Seeded pathumna Elina Svitolina chu Wimbledon vawi hnih champion tawh Petra Kvitova lakah 6-4, 7-5 in a chak lo, kum 27 mi Kvitova hian an intawn hnuhnung vawi sarihah hnehna a chang vek.