PSG-ah ka hlim–Neymar

Paris Saint-Germain star Neymar chuan Paris-ah a hlim thu a sawi a, tun hnaia Real Madrid pan tur anga an sawi chu thu leng vak satliah a nih thu a sawi bawk.

Khawvela footballer manto ber Neymar khelhna PSG hi Thawhlehni zan khan Champions League nomawi kawltu Real Madrid lakah 3-1 in an tlawm a, quarterfinal lut tur chuan an hmabak a hautak tawh dawn hle.

Brazil international Neymar chuan, "PSG-ah hian kum 2022 thleng daih contract ka nei a, ka ṭhiante nen hun nuam tak kan hmang, he hmunah hian ka hlimin hmun dang ka ngaihtuah lo," tiin a sawi.

Ligue 1 hmahruaitu PSG hian Inrinni zan dar 9:30 hian Starsbourg an mikhual zui leh nghal dawn a, Unai Emery tan player siksawi theihna hun ṭha a ni tura ngaih a ni.