I League = Neroca, Minerva, East Bengal
Champion beisei pathum an la awm!
India rama football inelna sang ber I League-a ngaihnawm chho zel–tun dinhmunah club pathum Minerva Punjab, Neroca FC leh East Bengal ten I League nomawi chawi an la beisei vek a, vawi khat chetsual pawh a pawi tawh dawn.
Hmahruaitu Neroca leh pathumna East Bengal inkarah point nga chiah a awm a, hriat tel ngai nghal chu Manipur club Neroca-in match hnihin an khel tam zawk–match hnih khel tlem chunga point khat leka Neroca phak lotu Minerva chu dinhmun ṭha ber an ni a, an hmabak match li-ah hnehna an chan vek chuan an champion ang.
Nomawi beisei zingah East Bengal chu vawiin chawhnu dar 2:00-ah an inlan dawn a, Gokulam Kerala khelmualah an lenglut ang–Pathianni chhun dar 2:00-ah Neroca chuan Mohun Bagan an mikhual dawn bawk a, he inkhel pahnih hi club pathum dinhmun hril thei tur a ni.
Champion zia East Bengal
Kolkata derby-a Mohun Bagan an ngam loh avangin East Bengal fan-ten nasa takin lungawi lohna an lantir a, mah se Bagan an ngam loh hnua an match hnuhnung pathumah tlawm hmel an hmuh leh tawh loh avangin champion beiseina an nei leh tawh.
Khalid Jamil-a'n Aizawl FC a champion pui ṭumin game hmuhnawm pholang fo lo mah se a hunah tak hnehna an chang ṭhin a, chak zo lo tura ngaih an nih hnuah champion zia chhuahin point an hlawh chhuak ṭhin–kha champion zia kha Khalid-a'n a la chhawm reng a, a tawp thlengin a naute an beidawng ngai lo.
Bagan an ngam loh hnua an match hmasa berah Minerva lakah si hnih phur hmasa mah se an sut zo leh vek a, hun pek belha Dudu Omagbeni goal hmanga Indian Arrows an hneh hnuah Minerva chu Cavin Lobo goal hmangin 1-0 in an hneh leh bawk–Punjab club laka an result hi EB tan season tawpa nomawi chawitir tu a ni thei. Point in anga season an khar chuan head-to-head a ṭha zawk East Bengal hi an champion ang.
Hmabak hautak Neroca
Second division champion nichungin Neroca-in I League an khel a, beisei phak bakin season an hmang ṭha–match hmasa bera Minerva Punjab an ngam loh hnuah match kua tlawm hmel hmu loin an kaltluang a, Shillong Lajong-in an kaltluang lai an hneh hnuah Minerva hneh lo nawn mah se insiamṭha lehnghalin hemi hnua match pali-ah point 10 an hlawh chhuak leh tawh.
Manipur club hi an hnuaia awm EB leh Minerva aia match hniha an khelh tam avangin dinhmun ṭha ber erawh an ni lo a, an match hnuhnung pahnihah an hmachhawn tur lah Mohun Bagan leh East Bengal an ni–a harsa dawn. Pathianni chhuna an hmachhawn tur Mohun Bagan-in rin loh taka Gokulam Kerala an ngam loh avangin nomawi chawi thei zing aṭanga thaibo an ni tawh a, team tum chakawm erawh an nih phah chuang lo.
Shankarlal Chakraborty enkawlna hnuaiah Mohun Bagan-in palina aia hniama season khar an duh dawn lo–Indian Super League club top four-te nena khelh tur anga sawi Super Cup lam rik a la nih reng avangin I League club ten he inelna hi khelh an chak a, club lian inti tan a sang pali zingah pawh tel phak loh hi mualphona a ni ang.
Minerva & inkhel dang
Champion la beisei club pathum zingah Minerva chu tunkar tawpa inlan lo tur awmchhun an ni a, Punjab club hian karleh Thawhlehniah Gokulam Kerala an mikhual ang–Minerva hi hmabak awlsam bera chhal ngam an ni a, match li khelh tur an neihah club lian tia sawi tur an awm lo.
Match li an khelh tur zinga match thum hi an khelmuala an khelh tur a ni a, Gokulam bakah Aizawl FC leh Churchill Brothers an mikhual ang a, khualmualah Chennai City an lenchilh bawk ang–hetihrual hian match tin hi tawlhthluk theihna a ni vek bawk. Gokulam hi Mohun Bagan hnehtu an ni a, Churchill Brothers-in harhna an chang mek a, AFC hi Santosh Kashyap hnuaia insiamṭhat tum mek an ni bawk–a awlsam ber tura ngaih Chennai lah khualmuala lenchilh tur an ni.
Kartawp I League inkhela ngaihven hlawh lo ber tura chhal ngam chu Chennai City leh Churchill Brothers inkhel tur hi a ni a, club pahnih hi vawiin tlai dar 5:30-ah an inkhel ang.