Federer tan match khat chiah a ngai ta

Roger Federer chuan kum upa lam a nih tawh hnua world number 1 nih leh chu a ngaihtuah ngai loh a nih thu a sawi. Kum 36 mi Federer hian world number 1 upa ber ni turin match khat chiah chak a mamawh tawh.

Ningani zan khan Grand Slam vawi 20 champion tawh Federer hian Philipp Kohlschreiber chu 7-6 (10-8), 7-5 a hnehin Rotterdam Open-ah quarterfinal a lut.

Federer hian Robin Haase a hmachhawn leh dawn a, semifinal a lut phak a nih chuan world number 1 Rafael Nadal dinhmun a luahlan dawn a ni. Swiss star Federer chuan, "Hun harsa leh hrehawm ka paltlang hnem ve a, match tam taka hnehna chang tur hian ka bei ngawrh hle a ni" a ti.

A vanglaia world number 1 ni rei thei ber Federer hi kum 2012 October thla hnuah a sang berah a la awm leh ngai lo a, nikum kumtir phei kha chuan world number 17 a ni. Mahse, season hmasa khan nomawi lian pahnih a chawi a, tun season ṭan nan Australian Open champion a ni leh tawh bawk.

Tun hmain Grand Slam vawi riat champion Andre Agassi chu kum 33 mi a nihin world number 1 a ni thei a, kum 2003 September thla a Agassi-a'n record a lo siam tawh chu Federer-a'n a rawn khum ngei dawn niin a lang.